Ṭhazual Award 2024 : Lengzem zan a pui dawn

Zonet cable TV buatsaih, Ṭhazual Award 2024 zan khatna, Gospel zan chu nizanah neih a nih hnuin, zanin hian Lengzem zan hman chhunzawm a ni dawn. Mizo lengzem artist kan neih ṭhatte an inlan dawn a, show hmuhnawm leh pui tak min rawn hlui leh dawn e.

Dawrpui Multipurpose Hall-a 10th Ṭhazual Award Lengzem zan hman tur hi Rini Hlondo-in zei takin a rawn host leh dawn a, boruak a hot leh viau ang. A hmuna chhimtu tan chauh ni lo, TV leh online lama lo thlirtute tan pawh a manhla leh hle ang. Show hi Zonet Zawlbuk bakah Zonet Empai app-ah pek chhuah a ni ang.

Live-a a zaithiam theih zia sawi nawn ngai lo, Mizo Idol 2023 Vanlalhmangaihi; tunlaia boruak nei lian em em Youth Icon 2024 Lalsangliana (Taitea) te che tla hmuh a chakawm tawh. An zaithiam piah lama an che vel hmuhnawm thei tak, Siampuii Ralte leh Ruatpuii an rawn che zei leh dawn chiang bawk. Zaithiam ngainat rawn ṭhin, tun hnaia rawn inlar ṭha leh Ticos Dara kan hmu dawn a, face-reveal a neih hnuah HOM rawn inlar tur a nghahhlelhawm a, Mendal boruak neih lenzia inhrilh thar leh a ngai lo. Pablo x Mistablow pawh an rawn che pui hle ang. Lilac & Jacks band in boruak an rawn ṭhap dawn tih a chiang a;, band ṭhangduang tak, The Radio zai pawh live ngeiin kan ngaithla thei dawn e.

10th Ṭhazual Award Lengzem zanah hian category pakua- Best New Artist (Male & Female), Best Male Artist, Best Female Artist, Best Pop Artist, Group/Duo of the Year, Best Music Video, Best Songwriter, Song of the Year leh Band of the Year sem a ni dawn. Band of the Year category bikah hian gospel leh lengzem chu huang khatah dah an ni.

Best Male Artist Lengzem atana chhawp chhuahte hi Guru Gee, HOM, K.Hminga, Mendal leh Youngfella te an ni a, Best Female Artist-ah Lilac, Mary Dawngi, Rebecca Lallawmsangi, Ruatpuii leh Siampuii Ralte te nominee an ni bawk.

Lengzem hla phuah thiam, best song writer nomination-ah Asanga, K.Hminga, Lilac, Philip Lalremruata leh Saiwana te an awm.

Song of the year atan Duhaisam - Youngfella x Mary Dawngi, Hellai Lungrun - The Radio, Hmangaihte hmangaih - Saiwana ft Vashty, Kan ta tur ni lo - Lilac & Jacks leh Rinawm min tiam kha - Aengi & Rosalyn te chhawp chhuah an ni bawk.