Hlawhtling tura mi hlawhtlingte zin kawng

Hna hnuaihnung leh sang kan thliar nasa lutuk te, thawh peih leh peih lo kan ngah lutukte hi kan hlawhtlinna chhan pakhat a ni ṭhin. Milar kan tih te, hnampui zawkte chuan hetiang hi an lo nei vak lo

Hlawhtling tur chuan a bul ṭanna hi ho tê pawh nise, taima leh rinawm taka thawh a ngai ṭhin. Zaithiam lar leh hlawhtling, film star hlawhtlingte pawh hi an hna hmasa chu tunlaia ṭhalai tam takin kan thawh peih loh tur leh zahthlaka kan ngaih a ni ve tho mai. Mahse an zak lo a, thawh chhuah neih kha an duh a, an thawk a, hlawhtlinna a rawn inhawng zel a ni.
College zir chhuak loa a zirna bansan ta, Kanye West hi a tirah chuan mi thawmhnaw thlep ṭhaa inhlawh ve mai mai ṭhin kha a ni. GAP-ah a thawk ṭhin a, thawmhnaw a thlep ṭha a, chumi hmang chuan pawisa a thawk chhuak ve ṭhin.
Pirates of the Caribbean hlawhtlinpui em em Johnny Depp pawh hi a ropui nghal lo a, a nu leh pa sum khawl sa aṭanga hlawhtling a ni bik lo. A tir chuan pen vel mia mai a hralh ve ṭhin. A zawrh dan kalhmang pawh tunlaia dawr-ak kan tih ang hi a ni. Pen a zuar a, lei turin khawlaiah mi a au ve lauh lauh ṭhin. Ballpen zuar aṭangin actor hlawhtling ni tur hian hna nasa takin a thawk ṭhin a ni.
Tun thlenga chuai thei lo, kum 60 tlin ṭêp tawh hnu pawha khawvel pop music thunun thei Madonna hi a tir aṭang renga hetiang ni bik hi a ni lo. Nula tam takin an hreh leh an zah em em tur hna a lo thawk nasa ve ṭhin. Eng hna mah hi rinawm taka thawh a nih chuan zahthlak a awm lo e. New York Times square-ah donut a zuar kual ve lauh lauh ṭhin a nia.
Ashton Kutcher hi lehkha thiam ve tho a nia, University of Iowa-ah biochemical engineering a zir ṭhin. Mahse a zir tluan chhuak chiah lo a, hemi hnu hian General Mills Factory-ah buh si leh favai nawi phiat faiin a inhlawh ve nasa ṭhin. Mizo tlangval tam tak chuan college kal paha thawh pawh an zak ang chu! Bul ṭanna chhe tê pawh nise rinawmna leh taimakna a awm phawt chuan hlawhtlinna a ni ṭhin.
George Clooney pawh hi tuna a thlawhtlinna kawnga sawi hmaih theih loh tur chu hetiang dinhmun a thlen nana a kal pelh tawhte hi a ni. Phei­khawk dawr­ah a inhlawh ve lawp lawp ṭhin a, chu mai bakah vaihlo chinna hmunah te a inhlawh ṭhin.