Pietersen lung a awi thei lo

February 2014 khan England and Wales Cricket Board chuan an batsman neih ṭhat ber te zinga mi Kevin Pietersen chu a nungchang ṭha lo leh mawi lo in a khelh dan a nghawng nia hriain England tana a khelh theih tawh loh tur thu an hrilh a, Kum 2015 World Cup-ah an mualpho hnu lawkin ECB chairman thar Colin Graves chuan Pietersen chu county cricket-ah a khel a, a khel ṭha a nih phawt chuan England team-ah koh leh a nih tur thu a hrilh.

Thawhṭanni khan sawiseltu te sawiselna field chhungah Pietersen-a'n chhangletin county cricket-ah a club Surrey tan run 355 zet a vaw­chhuak a, England team-ah a tan hmun a awm tawh loh thu hrilh a ni leh lawi si. ECB thutlukna hian England cricket a barakhaih a, Pietersen chhanin cricket player hranghlui ropui tak tak pawh an ṭawngchhuak.

Phatsan nia inngai Pietersen a rilru a dam thei lo a, kum 34-a upa batsman chuan, "Inphat­sanna lian tak ka chungah hian a thleng ni berin ka hria. Ka thinrimin ka rilru a na em em a, mahse engmah tih theih ka nei si lo a ni," a ti.

County cricket a khelh ṭhat chuan Eng­land tana khel tura koh a nih theih thu an hrilh vanga IPL team Sunrisers Hyderabad aṭanga inhnukdawk Pietersen chuan, "Ka theihna zawng zawng ka pe a ni. An beisei angin run tam tak ka siam a, England tan ka khelh tawh loh tur thu min hrilh leh si. Chairman khan dawt min hrilh tihna em ni? Amah chauhin he zawhna hi a chhang thei ang. Tom Harrison (chief executive, ECB) leh Andrew Strauss (director, ECB) te khan an thutluknaah Colin pawh a tel thu an sawi a, ngaihtuah thiam dan pawh ka tan chuan hriatthiam a har hle a ni," a ti.

Kum 1994 hnua County Championship-a run siam hnem ber Pietersen chuan, "Meeting tura min koh khan Eng­land tana ka khelh theih tawh loh tur thu min hrilh tur chuan min ko lo turin ka hrilh a, 'thawhho dan kan ngaihtuah dawn alawm' tiin min chhang. Tunah hmaichhanah ka tan hmun a awm tawh loh thu an sawi leh si," tiin a rilru nat thu a sawichhuak.

ECB director Andrew Strauss chuan, "Thla reilo te liamta aṭang khan ECB leh Pietersen inkarah inrintawnna a awm tawh lo a ni," tiin England batsman neih tawh zinga ṭha ber pawl chungchang a sawi.

England captain hlui Michael Vaughan pawh a ṭawngchhuak ve leh a, "Pietersen hi enkawl a harsa tih ka pha lo. Mahse, a theihna leh thiamna enin England team a khelh a phu a, England one-day cricket-in a ni hi a mamawh a ni," a ti.