OiC music video thar a chhuak dawn

Gospel group kan neih ṭhat, One in Christ chuan music video thar, 'Ni Ropui' chu zanin dar 6:00 hian an YouTube channel ah an ti chhuak dawn.

"Kan music video thar 'Ni Ropui' chu kan ti chhuak ve leh dawn a, kan Youtube Channel-ah Inrinni tlai dar 6:00-ah en theih turin dah chhuah kan tum" tiin Vanglaini an hrilh.

He hlaah hian OiC chuan Kohhran hrang hranga ṭhalai pawl te thawhpuiin, KṬP Armed Veng Branch, ṬKP Tlangnuam Unit, SAY Chanmari West Corps leh AYM Seventh-day Tlang te chuan zaipawl mai bakah video-ah pawh lemchan thlengin an pui. 'Ni ropui' tih hla hi Colours of Day tih hla kha niin, Alvin-a leh Diki te lehlin a ni a, chanchinṭha thehdarh kawnga Kohhrante inpumkhatna hlut leh pawimawh zia piahlamah Kristaah chuan pumkhat kan nihzia tarlanna a ni. Music hi Andrew Vanchhawng kut chhuak niin, recording hi Studio A-16 a record niin, video hi RDS Shots siam a ni.