Denzel-an zirlaite Pathian hre turin a chah

'In thil tihna apiangah Pathian dah pawimawh ber rawh u' - Denzel Washington

Actor lar Denzel Washington chu tun hnai khan Dillard University chuan thusawiah an sawm a, zirlaite chu an thiltihna kawng engkimah Pathian dah pawimawh hmasa ber zel turin a chah.
Actor hlawhtling leh Kristian ṭha, Denzel Washington chuan, "Engkim ka tih zawng zawngte hi Pathian khawngaihna avang liau liaua ti thei chauh ka ni tih hi ka hre chiang em em a ni. Thilthlawnpek a ni ber e. Keimah hian amah chu ka vuan a ni lo a, Ani chuan min chelh tlat zawk a ni," a ti.
Washington hian zirlaite chu hlawhchham hlau lo turin a chah a, vawi khat hlawhchhamah erawh beidawng mai lo turin a fuih bawk. Pawisa hlawh tur ngawr ngawra thawh a ṭha ber lo tih a sawi a, "Hna thawh hi engzata tam nge sum ka lak luh ang tih lam a ni lo. sum tam tak hi i thih hnuah i chhawm thei lo ang," a ti.
Eng ang harsatna pawh hma­chhawnin, an nunin eng thil pawh paltlang se, engkim Pathian ropuina tur vek a ni tih hre turin a chah a, "I ṭawngṭaiin lawmthu sawi ang che. A khawngaihna te, a zahngaihna te, a hriat thiam ṭhin che avang te, finna a pek avang te, nu leh pa, hmangaihna, ngilneihna, lainatna, muanna leh hlawhtlinna te i chungah a lantir a, a pe che a, heng zawng zawng avangte hian Pathian hnenah lawmthu sawi ṭhin rawh," tiin Denzel hian zirlaite a chah.
Film hit leh ropui tak tak a chang tawh a, A-list actor zinga mi a ni. Denzel Washington hian Pathian a ṭih hle a, actor-a luh a tum hma hian thuhriltu nih a lo tum tawh ṭhin.