Fashion Fiesta

Zoram dung leh vangah harhnain min nuai mek zel a, a tua te Kohhran pawh kan hlimin, a ngaihsak ve lem lote pawh a boruak hian min ṭham ve hrim hrim a ni. Harhna sawia sawi hmaih theih hauh loh tur Kelkang hming tel lovin kan nitin ti ti a kim thei tak tak lo a ni e. Zoram Kristian zaa za intihna ramah hian kan incheina hi Kristianna nen a inmil em tih hi a tam zawk ngaihtuah ngai lem lo a nih hmel. Thlarau lama harhnain Zoram a tuam mek laiin incheina khawvelah pawh a ṭha zawngin ṭhalaite bung thar kai i tum dawn teh ang. Inthuamna dangdai leh a thar lam ni loin kan neih tawh sate emaw kan ngaihven tur thawmhnaw zahawm zawk a hatu tizahawm thei tur ang te kan ngaihtuah a pawimawh. Hemi kawngah hian khawthlang rama kan Kristianpuite pawh hian ṭan an la nasa hle.

Fashion lampang ngaina tan chuan khawvela fashion show ropui bera chhal ngam Victoria Secret fashion show hi kan hre ṭheuh awm e. Kum 2009 daih tawh kha han thlir let leh dawn ila, khami kuma Angels pangngai ni lo, mipui lam aṭanga he show-a Angels tur an thlan ṭuma nu hleitling, inkhaithli ṭha tak mai, feet 5’10 lai mai a sang, sam buang thang mai, California lam chhuak Kylie Ann Ludlow (Kylie Bisutti tia kan hriat lar tak) kha kan hre ṭheuh awm e. Victoria Secret Angels anih ai mah chuan a nihna kalsana vawiin thlenga a ban chhan khan mite thinlung a hneh zawk fe! Ṭhalai lam chuan vawiin thlenga a thil tihte kan chik vak awm lo ve. Victoria Secret Model ni mai tawh loin tunah chuan midangte entawn tur (role Model) a lo ni ta zawk a ni. Engtiang chuan nge role model chu a lo nih tak? Khatia sexy tak maia kekawrte leh bra nen chauh runway-ah te leh photoshoot-naah te zahpah nei lem lo taka an han inthehṭil khan kum 15 mi lek anih laia aṭanga a lo zui tawh Lal Isua Krista hmel tibawrhbang tlata inhriatna neiin, ani phei chu pasal nei tawh a lo ni bawk nen, a pasal laka rinawm lohna pakhatah ngaiin American ṭhalai te nih ve chak em em Angels a nihna chu a kalsan ngam a, a kalsan satliah mai ni loin ṭhalai tam zawkte tan malsawmna nih tumin fashion line hlawhtling tak mai a din chhuak ta a ni.

Khawthlang rama ṭhalai Kristiante zingah hlut a hlawh chho hle a, kum 2013 January thla chuan Kristianna lam kaihhnawih thawmhnaw brand, God Inspired Fashion (GIF) tih hming puin a din a. He Brand danglamna tak chu thawmhnawa print satliah mai ni loin Jacket leh Bag te, kekawr leh scarf thlengin naupang thawmhnaw lam pawh an hmaih lo. Heng Items hoah hian an Brand-in an tum ber pakhat Chanchin Ṭha hril hna, Bible chang lar leh mite nun khawih turte thlang chhuakin an tarlang tel ṭhin a ni. Ṭhalai lamte ngainat tur leh Kristian kher lote pawhin an ngainat ve theih turin langsar deuhin Bible châng te hi ziak lang hluk loin, tunlai ṭhalai mil thei tur ang berin an tarlang tel ṭhin. An thawmhnaw siamchhuahho hian hlawhtlinna tamtak a neih laiin sawiseltu pawh a nei awl lo ve bawk. Abikin Pathian awm ringlotute, Atheist hoin an ngaimawh zual bik. A chhan pakhat nia lang chu naupang lam thawmhnaw an siamchhuah zinga Pathian thu an zeh tel ṭhin hian naupang rilru thianghlim a hruai kawi thei nia an rin avangin an sawisel nasa hle. Naupang chuan duhthlang thei tura rilru puining an la put loh avangin tihluihna hmanga Kristianna lam kawng inkawhhmuhtirna nia an rin vang pakhat a ni. Sawiselna karah a kum telin mite hlut an hlawh chho zel a, Communist ram ṭhenkhat China leh Cuba-ah te chuan Direct Evangelism te a theih ṭhin loh avangin heng thawmhnaw leh a kaihhnawiha Bible chang ziah tel hmang hian Chanchin Ṭha puandarh hna nasa takin an thawk mek zel a ni.

Hnampui zawkte tihdan entawn reng renga kan hun tam zawk hmang ṭhin Mizo ṭhalaite an inchei dan uchuak leh tunlaina chauh entawn lo hian hemi kawngah hian entawn ta zawk ila, kan tunlai viau zawk lo maw?

Tluangpuii Hmar
Instructreaa
Vakiria Institute of Fashion Technology