Blues music mi ropui BB King khawvelin a ui

Blues music chan­china dai tawh ngai lo tur, music khawvela mi ropui leh hnuhma ngah BB King tia khawvelin a hriat lar, Riley B. King chu Ningani khan Las Vegas-ah BP sang leh zunthlum kaihhnawih dehydration avangin a thi.

BB King hi Rolling Stone chanchinbu chuan 100 Greatest Guitarist of All Time a thlan chhuah zingah parukna a ni pha a, Gibson-in Top 50 Guitatist of All Time a thlan chhuahah 17-na lai a ni. Kum 1987 khan Rock n Roll Hall of Fame-ah lakluh a ni tawh a, music chawimawina ṭhahnem tak a lo dawng tawh bawk.

King of the Blues tia sawi ṭhin a ni a, Eric Clapton, Stevie Ray Vaughan, Sheryl Crow leh John Mayer te hi a influence vek an ni.

Mississippi-a piang a ni a, a naupanlai aṭangin an kohhran zaipawlah a tel ṭhin a, a tuipui em em ṭhin. A hnuah a pami, thuhriltu hnen aṭangin guitar perh a zir a, a talent a ni bawk a, a thiam chak hle. A thiam hnu hian kawtthlerah te guitar a perh ṭhin a ni. Indopui II lai khan sipaiah aṭanga, Indopui a zawh hnuah Memphis-ah a lut a, hetah hian music hmangin ei a zawng chho ṭan tak tak ta a ni. BB King tiha BB hi Beale Street Blues Boy tih lam tawi a ni.

Kum 1949 aṭangin mi hriat a hlawh tak tak ṭan a, kum 1950 chho kha chuan guitar avangin a lar em em tawh. Kum 1970 khan Best R&B Vocal Per­formance Male a dawng a, hei hi Grammy a dawn hmasak ber a ni. A hnu zelah Grammy-ah hian nomination ri­ngawt pawh vawi 30 lai a hmu tawh a, 15 lai a dawng tawh a ni. A dawn hnuhnun ber hi kum 2009 khan niin, Best Traditional Blues Album chu 'One Kind Favor' album hmangin a la a ni.