Baptist zaipawl music video thar

Aizawl Area Baptist Choir, hmana Baptist Choir Aizawl tia kan hriat ṭhin khan music video thar an tichhuak a, an music video tihchhuah hi 'Tihdam ka ni ta' tih hla a ni a, an conductor K. Lalremruata phuah a ni.

Tunlaiah kohhrana inhmang leh inhmang lo ṭhalaite zingah ngaihzawng avanga rilru hah a, mahni nunn la ta mai an awm ta nual a, ṭhalaiah chauh pawh ni lo, nun kawng zawh fuh loh avanga thiam loh inchantira beidawng te, natna khirhkhân avanga lunngai te, retheihna avanga beidawng mangang mi tam tak an awm ta a, heng mite hnenah Isua hi nuna kan neih chuan damna famkim a nihzia hriattir hla a ni.

K. Lalremruata, he hla phuahtu hian a ṭhian nu, intihhlum tum avanga a bâna thisen zâm vawi hnih lai mai zai tawh, Pathian chhanchhuahna changin testimony a sawi chuan a rilru a hneh hle tih sawiin, he hla hi a phuah ta a ni. Music video-ah hian drama a tel a, he drama-ah hian kohhrana inhmang tak nula pakhat chuan sawn a pai a, a bialpa chuan nei leh duh loin, a fa a ni loh thuin a pha a, chutia mangang taka a awm lai chuan a inhmuchhuak a, a nuna harsatna chu hmachhawn turin huaisenna a nei ta a ni.

Baptist Choir, Aizawl te hian mis­sio­nary te ngenna angin Arunachal Pradesh-a hnam chi khatho hla music video-a siam tumin hma an la mek a, hei bakah hian kumin kum tawp lamah hian music video album emaw, zaipawl concert live album emaw tihchhuah an tum.