Nov 14-16 ah Leitlangpui Music Festival hmang dawn

Mizoram Tourism Department, Brighter Co leh BBYANIMALS te ṭangkawp buatsaih, Leitlangpui Music Festival chu November 14-16 chhung hian Kawmzawlah neih a ni dawn.

November 14, 2024-ah festival hawnna hi neiin, hemi ni hi traditional day anga hman tur a ni dawn a, hnam lam chi hrang hrang thlir tur a awm ang. November 15-ah Beat Contest neiin band 10 an inel dawn a, district hrang hrang aṭangin band an tel dawn a ni. Festival tawp ni, November 16 hian Mizorama zaithiam lar rual inlanna concert pui tak neih a ni dawn a, concert pangngai zawhah sawm bik, hranghlui zaithiamte nen 'Leitlangpui Night' hman a ni ang.

Festival neih chhung hian artist village campsite, chhungkaw intih hlimna, ei tur zawrhna stall bakah, puan leh thawmhnaw dawr hrang hrang siam a ni bawk ang. Ground chhungah Museum of Leitlangpui History, Mizo te hla lenglawng chhuahna bulpui nia sawi leh, Mizoram chhunga concert kan neih hmasak ber ti a chhal ngam ‘Serkawn Concert’ hriatrengna leh hla phuah thiam hmasa te sulhnu leh kutchhuak te hmuh theihin a awm dawn bawk a ni.