Bad Boys an lo kir e
Box Office-ah Bad Boys for Life-in sum a lalut tam ber a, 1917 chu sum lalut tam pahnihna niin Dolittle chu pathumnaah a ni thung.
Kum 16 hnua lo let Bad Boys
American action comedy film, Will Smith leh Martin Lawrence-te channa Bad Boys film hi chu mi tam zawk chuan kan hre awm e. Kum 16 zet a liam hnuah Bad Boys II chhunzawmna Bad Boys for Life (Bad Boys III) chu Zirtawpni liam ta khan US-ah tlangzarh a ni a, Box Office-ah ro an rel nghal.
Bad Boys for Life-ah hian Vanessa Hudgens, Alexander Ludwig, Charles Melton, Paola Núñez, Kate del Castillo, Nicky Jam leh Joe Pantoliano-te pawh an inlan a, khawvel puma a sum lakluh tawh zat chu $maktaduai 112 a tling der tawh.
US-ah bik hian theatre 3,775 aṭangin $mtd 62,150,000 zet a lalut bawk. Film siamna atana an budget hi $mtd 90 zet a ni a, a film hi darkar 2 leh minute 4-a sei niin Mike Lowrey leh Marcus Burnett-te chetla kum 16 zet a liam hnuah en theihin a awm leh ta a ni.
Kum 2008 chho velah khan Bad Boys II director Michael Bay khan Bad Boys III a direct leh mai thei tih sawi mah se Will Smith nen film industry-a hlawh an phut zat a san em avangin a direct ta lo a, kum tam tak an reh hnuah Adil El Arbi leh Bilall Fallah-te direct-na hnuaiah nikum January aṭanga June inkarah khan Atlanta, Miami leh Mexico City-ahte an chang leh a ni.
1917 leh Dolittle
Oscar award sem tura nomination hmu hnem tak, Indopui I-na hunlaia British sipai general-in sipai pahnih lehkhathawn kenga a tirh, an kalkawng hautak tak lantirna film 1917 chu pahnihnaah a awm ve thung. Robert Downey Jr. channa, Zirtawpni liam taa tlangzarh Dolittle chu sum lalut tam pathumna a ni ve bawk.
Dolittle hi Dr Dolittle film siam ṭhat leh a ni a, he film- aw thawhtu zingah hian Selena Gomez, Tom Holland leh Rami Malek-te pawh an tel.
Star Wars-in ngam loh a ngah ta
Chart hmasaa pathumna Jumanji: The Next Level chu palinaah a awm ve ta a, hunrei tak chhung Box Office roreltu Star Wars: Episode IX - The Rise of Skywalker pawhin ngam loh a nei ta nual a, Top 5-ah erawh a la inham tang pha thung.
Kar tawp Box office-ah khan Top 50 chinah pawh film thar lang phak a tam vak lo a, Bad Boys for Life leh Dolittle bakah hian Weathering with You leh Citizen K-te chu an lang phak a ni.
Box Office Top 10:-
1 Bad Boys for Life $mtd 62
2 1917 $mtd 22
3 Dolittle $mtd 21
4 Jumanji: The Next Level $mtd 9
5 Star Wars: Episode IX - $mtd 8
The Rise of Skywalker
6 Little Women $mtd 6
7 Just Mercy $mtd 5
8 Knives Out $mtd 4.3
9 Like a Boss $mtd 4
10 Frozen II $mtd 3