Lallianmawia Pachuau A thih cham pualin hun an hmang

A vanglaia Zoram khawvelin an ngaihsan, zaithiam lar ṭhin, a hun hmaa fam ta, Lallianmawia Pachuau thih champha phak pualin Zirtawpni zan khan Ignite Studio-ah, Lallianmawia Pachuau Memorial Society buatsaihin hun hman a ni a, zaithiam hrang hrangten a hla an sa a, an hun hman hi zanin, Lallianmawia Pachuau thih champha phakah LPS leh Zonet-ah tihchhuah a ni ang.

Lallianmawia Pachuau hi a vanglai tak, kum 1987 May 18 khan a thi a ni. A hlate a hunlaia Mizote tuipui ber a ni a, 'Di fuh te', 'Jenny a tel ve lo', 'Thliah loh tleitir' tih leh a hla, tam tak chu tun thlengin kan hriat lar a la ni reng a, 'Di fuh te,' 'Duatlai Ate', 'Zanlai thlifim' albumte chu tun tlengin Mizo album tihchhuah tawha hralh hnem ber pawl a ni. Fakna hla a phuah 'Engkimah min hria' tih chu tun thlenga fakna hla ṭha berte zinga mi a ni.

Local channel ZONET leh LPS bakah Aizawl Doorsarshan chuan Lallianmawia Pachuau vuiliam ni May 20 tlai dar 3:30-ah Lallianmawia thu leh hla lama a hlutna lamhawiin programme an buatsaih a, he hunah hian LMS-in progrmame hrang hrang a siam chu tihchhuah a ni ve leh dawn bawk a ni. Ignite Studio-a an record-ah hian Lallianmawia Pachuau chhungte ṭhahnem tak, Aizawl leh Zawlnuam aṭangin antel thei a, a fapa upa zawk Lalnunpuia Pachuau pawh he hunah hian a tel.

Sangkhuma (SK-a) Lallianmawia boral dawn zana chaw a eina in leh Lallianmawia nena inkawmngeih tak chu Lallianmawia puala hun hman zanah hian kalin, kum 30 dawn kaltaa thil thleng chanchin a sawi thar a, ani mai bakah hian amah hrechiangtu leh a lo zaipui tawh ṭhinten thu an sawi bawk.

SKA chuan Lallianmawia chetsual zan chanchin sawiin, ‘Ka ṭhian kawm ngeih tak a ni a, amah pawhin min ngaina em em. A chetsual dawn zan, May ni 17,1987 khan kan inah zanriah a ei a, kan ina riak nghal tur a ni bawk; zan dar 10 velah pawnah zun zunga a chhuak chu, kan in bul khamah chuan a tla thla a, kawng thlang a tla thleng a ni, a na hle a, a tuk maiah min boralsan ta a ni’ a ti.

Lallianmawi Hriatrengna hun hmannaah hian a hla lar hrang hrang thlan chhuahte mipuiin a khat tawkin a huhovin an sa a, Live Music-in House Band member Thang­bawiha (Guitars), MSA (Guitars), RMA (Bass), Johny (Drums), Mickey LS Pachuau (Keyboard) te an rem a, Tepuia Ocean Sound-in sound an enkawl. He hunah hian Lallawmawma, B. Vanlalmalsawma, C. Vanlal­mal­sawma (Sawmtea), David L. Hmar, Lalruatfela Pachuau, Helen Zaithankungi Sailo, H. Lalrin­kimi leh Edentharmawia te’n Lallian­mawia hla puah hrang hrangte an sa hlawm a, an thiam hlawm hle.