Box Office: Sakhaw behchhan film-te an che ṭha

North American box office-ah Tom Hardy channa 'Venom : The Last Dance' chu a kar thumna atan No 1 a la ni chhunzawm a, US mtd 16.2 a hmuh belh leh. Khawvel huapa a sum lak luh hi UD mtd 394.2 a tling tawh.

'Venom : The Last Dance' hi an beisei angin North America lamah thawm nei lian lutuk lo mah se, ram dangah a che ṭha hle thung. A bikin China lamah a che ṭha a, USD mtd 100 chuang a la lut thei.

Sakhaw behchhana film siam tharte an rawn che ṭha a, No 2-ah 'The Best Christmas Pageant Ever' awmin, No 3-ah 'Heretic' a lang bawk. 'The Best Christmas Pageant Ever' hi naupang lehkhabu behchhana siam, naupang rualten an khawtlanga Krismas awmze dik tak an lantirna chungchang a ni. Tlangzarh karah US mtd 11.1 a la lut a ni. Hugh Grant channa, 'Heretic' pawh hi Kristian missionary-te rinna fiah a nih dan chungchang a ni a, North America-ah USD mtd 11 a la lut a ni. Heng film pahnihte an budget pawh a sang lo a, an hlep ṭhat hle rin a ni.

'The Wild Robot' chuan a kar kuanaah USD mtd 6.6 lak luh belhin No 4-ah a la awm a, khawvel huapa a sum hmuh chhuah hi USD 292.5 ni tawhin, budget aia a sum hmuh chhuah tamna hi 275% zet a tling tawh. No 5-ah USD mtd 5 la luttu, 'Smile 2' a awm bawk.