Tichhuah loh ṭêp HEY ESSY'n pakhatna a la hauh zel

Chart-ah a hlawhtling a, pakhatna hauh leh mah se, Hey hi hun a neih chêp avangin Essy hian a tichhuak lo ṭêp

Ṭhazualah a ṭum thumna atan Essy chuan pakhatna a hauh leh ta. Essy hlawhtlinna a sang zel a, 'Hey' lo ti ve ngawt mah la, a hlawhtlinna a la kal tluang zel.
Zoram Electrical Store Ṭhazual Lengzem chart thar berah Essy hla hit 'Hey' chuan pakhatna a luah leh a, pakhatna hauh zel thei turin Essy hla hi a ṭha a, amah a zaithiam tawk bawk. Chutihrualin top 10-a langte hi an ṭha hlawm a, rinlawk dik erawh a harsa ve det ang.
'Hey' hi tun aia tlaiah kan hmu teuh viau mai. Essy chuan, "Kan tichhuak lo ṭep a, mahse engtin tin emaw kan ti a, kan tichhuak ta hram a ni," a ti. "Class kal ṭan ka duh tawh si a, hun kan nei tlem tawh si a, a video-ah pawh duhthusam ang zan a ni lo a, a video siamtute pawhin tih ṭhat leh an duh khawp mai a, mahse hun ka neih tawh loh avangin ka duhthusam ang zan ni lo mah se, kan tichhuak ta tho a ni," a ti. Chutianga chawpchilh deuh taka tihchhuah a ni chunga hetianga a hlawhtling hi Essy chu a lawm hle.
Music video tur dang Essy hian a buaipui leh mek a, tunah hian Mapuia tia kan hriat, Lalremruata, Dawrpui hla shooting an ti mek a, nimin tlai leh zan te khan an shot. He hla hi 'Zohnahthlak ka thlang' tih hla a ni. A tihchhuah hun tur erawh Essy hian a la sawi chiang thei lo. "Engtikah nge ka tihchhuah ang tih ka la sawi thei lo a, 'Hey' hi ka ngaichang rih deuh; mahse a theih anga ranga tihchhuah erawh ka tum ang," a ti.
Zaia a zin nasat avangin Essy hian hun a nei tam lo khawp mai a, a taksa pawh a chau viau. Typhoid avangin a inenkawl rên râwn a, tunah erawh chuan ziaawm lam a pan a, a ṭha tawh viau a niang, video shooting pawh a ti thei tawh a ni.
Zoram Electrical Store Ṭhazual Lengzem-ah hian pahnihnaah C. Sanga hla 'Chhingkhual Lenmawi' tih a awm leh a, pahnihnaah ṭum hnih a awmna a ni ta. J. Lalremruati hla 'Inhrilh dun ang' tih chu pathumna aṭangin palinaah a chhuk a, Christy hla, 'Tleitiri' chu pathumnaah a rawn chho thung. Thiamchantira pawh 'Lo kir rawh' tih hla hmangin parukna aṭangin panganaah a rawn kai chho.
Feli Fanai chu top 10-ah a rawn lang thar. Mizo ṭhalaitena thiam an tih leh an lawm Feli Fanai hla thar 'Ka liam e' tih hi 10-naah a rawn lang a, Kolkata Mizo Student-te hla 'Kan ding (Zoram tan) tih chu top 10 aṭangin a tawlh liam ta thung.

Zoram Electrical Store Ṭhazual Lengzem
1 Essy - Hey
2 C. Sanga - Chhingkual Lenmawi
3 Christy - Tleitiri
4 J. Lalremruati - Inhrilh dun ang
5 Thiamchantira - Lo kir rawh
6 Famkimi Kawlni - Ka ngai em che
7 Lawmi Khiangte - Mangṭha
8 Raymond Lalhriatpuia Chhangte - Hmanlai chang tur
9 Joseph Fanai feat Tetea - Nuimawite
10 Feli Fanai - Ka liam e