Miss India contest-ah Mizoram aiawh tur Lalmuansangi

Femina Miss India thlannaah Mizoram aiawhin Miss Mizoram 2020 2nd Runner Up, Champhai District Miss ni bawk Lalmuansangi chu a tel dawn tih a chiang ta. 

VLCC Femina Miss India 2020 state winner-te chu nimin khan official-in Miss India Organisation-in an puang a, Miss India Organisation hian state 31 aiawh tur chu an tichiang ta a ni. Miss India thlannaa Mizoram aiawh tur hian Lalmuansang bakah hian Celina Chakma chu a tel bawk a, mi pakhat chauhin Mizoram ai an awh theih si avangin Miss India Organizer lam chuan Champhai Zotlang nula Lalmuansangi hi an rawn thlang ta  a ni.

Vanglaini palai zawhna chhangin Lalmuansangi chuan hemi atan hian Miss India buatsaihtu lam hian Zoom kaltlangin interview an nei tih a sawi a, zawhna pawh an zawt chipchiar hle tih a sawi. "Darkar khat vel kan pahnih khan min kawm a, darkar chanve ve ve vel ang chu min kawmin ka hria, zawhna pawh min zawt chipchiar khawp mai," tiin Vanglaini a hrilh a ni. Miss India contestant-te hian vawiin aṭang hian Miss India lam hi an hawi lehzual tawh dawn a, vawiin hian orientation online-in an nei phawt dawn a, kumin chhung chu online hmangin thil an kalpui hrih dawn a nih hmel.

Lalmuansangi hian a hmain he inelnaa a tel tur hi a huphurh rualin phurawm a ti tawh hle tih a lo sawi tawh a, Mizoram hminga chhuak tur a nih avangin Zoram mipuite pawhin kan thlawp ṭhat hle a ngai dawn a ni. Kum 25 mi Lalmuansangi hi Champhai Zotlanga cheng a ni a, Ft. 5'6.5" a sang niin MA English a zo tawh a, MZU-ah B.Ed a zir leh mek. Kumina Miss Mizoram thlanna neihah khan Champhai district aiawhin a tel a, final round thlengin a che ṭha hle a, 2nd Runner Up hial a ni thei a ni.