ṬHAZUAL AWARD Lengzem huang chawimawina sem zan a 'HOT' dawn

Zonet Ṭhazual Award, Lengzem huangchhunga zaithiamte puala hun hman hun a hnai telh telh a, ni tam a awm tawh lo. Zirtawpni zana Vanapa Hall-a award sem ceremony-a perform turte a hriat ta a, a 'hot' hle dawn tih a chiang.

Ṭhazual award Lengzem-a category hrang hranga chawimawina dawng theite hi puanzar ni tawhin category pahniha hming lang an awm nual. Feli Fanai chuan Best Female Artist leh Best Music Video category-ahte nomination a hmu a, Zorinzuali pawhin hemi category pahnihah hian a hmu ve bawk.

Awmtea Polymer chu Best Male Artist leh Best Group/Duo-ah a hming a lang a, Rpa Ralte pawh Best Male Artist leh Best Songwriter-ah a hming hmuh tur a awm. KR Robert lehTuaisiala-te chu Best Group/Duo leh Best Music Video category-ah an hming hmuh tur a awm a ni.

Perform turte bihchiang zuai ang

Grace 10:45

Mizo hmeichhia blues music tuipui tlemte zinga mi, mahni hla phuah ngat sa ṭhin Grace 10:45 zai tur hi a nghahhlelhawm hle. 'No Khat' nge 'Sulhnu' a rawn sak dawn a la hriat loh a, 'Sawiselboi' emaw a hla tlangzarh mai a tum mek 'Kumtluangin' a rawn sa dawn tih hriat a chakawm a, beng erawh a tlai dawn tih a sawi ngam.

Jojo

'Hmangaihtu Thinlung' thiam taka satu Jojo zai kan ngaithla dawn. Jojo hian tunhnaiah hla thar tichhuak lo mah se nikum lama a hla tihchhuah  'Hmangaihtu Thinlung' leh 'Tunah Zawng'-te khan ngaihthlak a hlawh a, 'Hmangaihtu Thinlung' phei chu mi nuai li dawnin YouTube-ah an thlir tawh a ni.

Feli Fanai

Tunge a nih sawi nawn a ngai lo a, Zofate zingah lengzem artist tlana ber pawl hun eng emaw chhung chu a ni ta. A music video a hmuhnawm ṭhin angin live pawhin performance hmuhnawm tak min entir ṭhin a, mit leh beng a tlai dawn. Tuna Ṭhazual award sem turah pawh hian nomination category pahniha hmu thei a ni a, award semnaah a rawn che pui lo ang tih rin phal chi a ni lo.

Sangkimi Khiangte

Ṭhalaite khawvel a ni tawh han ti ṭhin bawk mah ila Mizo folk song tel lo chuan a kim thei ṭhin lo. Best Mizo Taditional Artist nominee Sangkimi Khiangte hian Mizo rilrem zawng tak hla hmangin award sem ceremony chhimtute leh thlirtute min awi dawn niin a lang, a phurawm tawh. 

Awmtea Polymer

A music video engzatin nge million view kai sawi lan chakawm khawpa a hla ngaihthlak hlawh Awmtea Polymer live performance kan hmu dawn. 'Thlasik Rim' hitmaker hian hla hit a ngah a, eng ber nge a rawn thlawh chhuah dawn hriat a chakawm tawh. Chumi hre tur chuan Ṭhazual award semna ceremony i en ngei a ngai a ni tawp mai.

Keimah Senes & Tlangval Tlumtea

'Sawnu saw a hmel a ṭha' an rawn ti dawn nge 'Mizo Nula' an rawn ti dawn zawk? Nge 'Min duh lo der' an rawn ti dawn? 'Sawnu saw a hmel a ṭha' hitmaker-te hi eng ang takin nge an rawn tal dawn hre tur chuan Zirtawpni zan nghah a ngai. Thlirtute an tingui lo ang tih erawh a rin thiam theih mai e.

Mood Station

Chapchar Kut-a 'Lammual Tuipui' fawn tirtu hi eng ang takin nge Ṭhazual Award sem ceremony-ah an rawn 'Sapatal' dawn tih hriat a chakawm tawh. Rolling Stones India-a an hming lo lang zak zak tawh Mood Station hmuh an chakawm tawh a, chutih rual chuan hripui vangin chhimtu an tam thei dawn si lo a, Vanapa Hall tuipui an fawn tir thei dawn lo. I sitting room aṭangin TV kaltlangin an fawn tir tawh mai che a niang chu.

Zaii Hauchham

Tunhnai ramri buai vanglai taka 'Zoram Hmangaihtu' rawn thar thawtu Zaii Hauchhum a perform dawn. Lalruatpuii hla 'Zoram Hmangaihtu' hi a rawn sa dawn nge hla dang a rawn sa dawn hriat a chakawm tawh hle. A live performance pawh a hmuhnawm turah beisei ang.