Deepika Padukone hnenah Crystal Award hlan

Bollywood star, tunlaia boruak nei lian tak Deepika Padukone chu Pathianni khan World Economic Forum Crystal Award ceremony-ah Crystal Award an hlan.

India lemchan thiam kum 34 mi Deepika hnenah hian Hilde Schwab, Chairwoman leh World Economic Forum-a World Art's Forum co-founder ni bawk Hilde Schwab chuan award hi a hlan a ni. Deepika hian rilru lama harsatna neite ṭanpuina tur  Live Love Laugh Foundation a din a, helam kawnga a hnathawhna avang hian World Economic Forum chuan chawimawina hi a hlan.

"Rilru lama damlohna hian mitin mai hi chona hautak tak min siam a ni. Rilru lama harsatna ka neih ṭhin chuan thil tam tak min zirtir. chung zinga pakhat chu dawhtheihna hi a ni. Mal takin i awm lo a ni tih hi pakhat leh chu a ni a, mahse a pawimawh ber chu beiseina a awm tih hi a ni," tiin award a laknaah hian a sawi. "Martin Luther King ṭawngkam hawh ila, he khawvela thil engkim kan tih hi, beisenaa ti kan ni," tiin a sawi bawk.