Thawhlehnaniropuia Music video thar nen a rawn tho

Mizo Idol 2015-a pathumna Thawhlehnaniropuia chuan music video a rawn tichhuak leh ta a, a music video thar hi 'A rei si lo' tih a ni.

Kum 2015 kum tira Idol aṭanga kan hriat hnuah Thawhlehnaniropuia hian kum tawp lamah music video a rawn tichhuak chauh a, Krismas hla a ni. Amah a zaithiam a, Krismas hla ṭha tak min ngaihthlaktir a, a man hla hle.

Kumin kum tir lam khan 'Lalpa fak rawh' tih music video hmangin Lalpa min faktir leh te te a, tunah 'A rei si lo' hla hmangin min rawn awi leh ta. Tuna a music video thar ber hi Idol aṭanga kan hriat hnua a music video pathumna a ni.

Puipuia hian a hla thar hi a duhin nalh a ti hle a, chuvang chuan ngaihthlak pawh a man hla lehzual hle ang. A hla thu kalhmang pawh a rilrem zawng tak a ni a, a nalh a tih, a duh berte zinga mi a ni. Hmun hrang hranga zai tura an sawmnaah pawh a sak ngun pawl tak a ni nghe nghe.

'A rei si lo' tih hla hi tunlaia hla phuahtu lar, Parpuii Chawngthu phuah a ni a, a music hi Kima Chhangte kutchhuak a ni thung. Melody Recording-ah an record a, M Space chuan video lam an khawih. MDM Library-ah dah tawhin tunah hian TV lamah pek chhuah mek a ni.

Puipuia hian tuna a hla bak hi chu kuminah hla dang a tih≠chhuah tawh hmel loh riau. Pawl sawm a zir mek a, zirna lama
ṭanlak a duh avangin kumin chuan a ri a reh deuh rih dawn a ni. Amaherawhchu kum a thar leh a, pawl sawm a exam zawh chuan music video thar ṭha zawkte pawh min la entirin min la ngaihthlaktir leh ngei ang.