Samsung Galaxy Note 7 an launch

Phone man tlawm ṭha si kan sawi ṭhin a, tunah chuan phone man to ṭha si kan sawi thung ang. Thawhlehni khan Samsung chuan an phone thar ṭha em em tura ngaih Samsung Galaxy Note 7 an phochhuak a, he phone hi London, New York leh Rio de Janeiro-ah te an phochhuak a, August 19 aṭangin lei theih turin an zuar chhuak ang.

Galaxy Note 7 hian iris scanner (mit note tlalakna) a awm a, Samsung kutchhuak phone bika hetiang thil awm hmasa ber a ni a, Galaxy Tab Iris-ah khan an lo vuah tawh. Bawlhhlawh nawi leh tui laka him tura siam a ni a, hei bakah hian Samsung Knox security hmanga thuam a ni a, iris scanning leh fingerprint scan te a theih dawn a, a neitu ni lo tan chuan hawn ngaihna vak a awm dawn lo a ni.

A hmai hi inchi 5.7-a hlai a ni a, QHD (1440x2560 pixels) dual-edge Super Amoled display a nih avangin a ṭha viau ang; hei bakah a pixel density pawh 518ppi a ni a, a ṭha hle. Corning Gorilla Glass 5 hmangin a hmai hi thuam a nih avangin a tlo hle dawn a ni.

Processor-ah hian 14nm octa core a hmang a, a RAM hi 4GB a ni a, LPDDR4 RAM a hmang. Inbuilt storage hi 64GB a ni a, hei bakah hian microSD card, 256GB thlenga lian a hmang thei. Android 6.0.1 Marshmallow a hmang a, a camera hi 12MP a ni a, a MP zawng chuan a aia sang a tam a, mahse hei bakah hian a thlalak a ṭhat theihna turin hmanraw chi hrang hrang hmanga thuam belh a ni. Battery hi 3500mAh a ni a, a charge rei lohna tura thiamna thar ber ber hmang a ni.