Hayley Williams hla thar tur 'Simmer'

Paramore vocalist chuan ama puala single vawiin hian a tichhuak dawn tih a lo sawi tawh a, Thawhṭanni khan a hla thar tur hi 'Simmer' tih a ni dawn tih a sawi.

Simmer hi a project pakhat Petals for Armor zinga mi a ni dawn tih sawi bawkin, twitter lamah a hla tihchhuah tur chungchang hi a tarlang. Kum 2017-a Paramore-in  After Laughter album an tihchhuah hnu khan Williams hian hla thar a la nei leh lo a, kumin lamah erawh hma lak thar a tum leh a nih hmel. Nikum lamah khan Paramore hmalam hun awm zel dan tur a hriat loh thu leh, an dinhmunah chuan ṭhian anga inkawm khawm nuam an tih rih zawk thu a lo sawi tawh a ni. Tunah solo-in single thar a tihchhuak leh dawn ta si a, an band hmalam hun turah zawhna a tam hle ngei dawn niin a lang.