July 25-ah K-Pop Event Rawn kal tur engmah a la chiang lo

Mizoramah K-Pop star an rawn kal dawn tih aṭangin mi tam tak kan phawklek a, kan ngaihven a, tunah chuan an rawn kal hun tur a chiang ta, July 25-ah an rawn kal ang.

Aizawla K-Pop Contest Event neih turah hian Contestants, event managers, Korean sumdawng te leh Korean Embassy-a thawk officials Korean Cultural Centre India chuan a rawn tir dawn a, K-Pop band te rawn kal tura ruahmanna erawh la tih chian a ni lo. He contest rawn chhim tur zingah hian Kim Kum Pyoung, Director/Counsellor, Embassy of the Republic of Korea pawh a rawn tel dawn a ni. K-POP Contest 2015 senso hi KCCI in a tum vek dawn a ni.

Tun aṭanga mi tam tak buaina chu gate entry a ni a, man to deuh turah ngaiin social media-ah rindan an sawi nasa hle. Rintlak erawh heng zingah a awm lo a, sorkar thuchhuah chuan gate entry a la ngei dawn tih a tarlang a, mahse hei hi hlawkna hmuh tumna ni loin, event a buarchuar loh a, a nazawng lutukin an chil phulh lohna tur tawkin, tam tham lo tê lak a ni ang.

Mizoram sorkar lam chuan uluk takin he hun hman dan tur leh hmanna hmun turte a ngaihtuah a, committee siamin, anni hian a neihna tur hmun hi an ngaihtuah ang.

KCCI-in tuna Aizawla rawn nghah an tum hi K-Pop Event 2015 North East Round a ni a, sorkarin thuchhuah a siam chin bak hi chu rintlak a awm rih lem lo.