Rosy-i US-ah a thlawk thla

Mizo Society of America-in an sawmna tihhlawhtlingin Rosy K. Remsangpuii chuan vawiin hian US panin a thlawk chhuak ang. Rosy-i hian nimin khan Kolkata aṭangin US Visa a tifel a ni.

Rosy-i hian US-a Mizotena Chapchar Kût an hman turah a hmanpui ang a, chumi hnuah US hmun hrang hranga Mizote zingah a concert zui dawn a ni. May 23 khian Maryland-ah Chapchar Kût hman a ni dawn a, hei hi a kal chhan pui ber a ni, hemi hnu hian Indianapolis, Michigan, Dallas leh hmun hrang hrangah a kal leh ang. Rosy-i ang bawk hian Myanmar aṭangin Pantei pawh chah thlak a ni a, ani hi chu Yangoon aṭangin a hma deuh hlek khan US hi a pan tawh.

"Ka phur a, ka châk a, ka lawm em em a ni. Ka theihtawpin ka buatsaih a, mahse hun ka nei tlem hle; ka nau a damloh avangin damdawi inah awmpui reng a ngai a, mahse hun ka neih ang angah theihtawpin ka inbuatsaih. Live music nen rema zai tur niin ka inhria a, ka phur tawhin ka châk tawh hle a ni," tiin Rosy-i chuan a sawi.

"Lusei hla, Lai hla, Sap hla leh Vai hlate sa turin ka inbuatsaih a, Mizo awm khawm tamna deuhah te concert nei zui tur kan ni a, a châkawm rual rualin a huphurhawm hlein ka hria," a ti bawk.

A kalna tur ṭul leh mamawhte Mizo Society of America hian an tumsak vek a ni. Thla hnih vel châm turin Visa a nei phawt a, US-a Mizote hian a châm rei theih dan tur an ngaihtuahpui dawn niin a sawi.

Rosy-i hi Myanmar leh Imphal-ah te sawmna a hmu a, mahse US-ah hian a kal ta zawk a ni. Tun hi ram pawn a tlawh vawi lina tur a ni a, a hmain South Africa, Malaysia leh Myanmar-ah te zaiin a lo kal tawh a ni.