Aizawlah Film-Fest 2024 neih a ni

North Eastern Council (NEC) bultumin, Entertainment Society of Mizoram (ESM) chuan nimin, November 14, 2024 khan I&PR Auditorium, Treasury Square, Aizawl-ah Film-Fest 2024 a buatsaih. I&PR Department joint director, Mina Zoliani Joute chu khuallian niin Film-Fest 2024 hi a hawng a ni.

Nimina hun hman hi ESM vice chairman, Lalhruaitluanga Ralte chuan kaihruaiin, Film-Fest pual hian 'Mizo Film Industry dinhmun leh hmathlir’ tih thupui hmangin sawi hona bakah zawhna leh chhanna hun hman a ni. Andrew Lalchhandama (DDK) in kaihruaiin, MFF, MFDS, MZU Mass Communication, Lersia App, Leitlang Pictures, In-House Production leh Conflate Video Production aiawhten thu an sawi bawk. ESM chairman B. Lallawmkima chuan lawmthu sawiin hun hman hi a khar.

Film-Fest 2024 ah hian film industry leh hemi lama tui mi ṭhahnem tak an tel a, Mizoram University-a Mass Communication Department hotute leh an zirlai ṭhenkhatte bakah, Mizoram-a film siam lama sulsutu pawimawh leh mi hlawhtling tak takte bakah I&PR Department hotute an tel.