EU-in Meta USD mtd 841 chawi turin a hriattir

European Union regulator chuan Facebook parent company, Meta chu Marketplace practice a kalpui dan dik tawk lo leh, competiton law bawhchhiaa puhin mtd 797.72 (USD 841) chawi turin Ningani, November 14, 2024 khan a hriattir.

Europe ram 27 awmna, European Commission executive branch chuan Meta chu a social network chhungah Facebook Marketplace a siam avangin dan a bawhchhia tih a sawi. Facebook user-te chu an duh emaw duh lo emaw Marketplace-ah hian hruai lutin, an elpuite an dang bet niin an sawi. Hei hi dik lo taka sumdawnna kalpuina a ni tiin, an thil tih dan hi titawp turin EU antitrust head, Margrethe Vestager chuan a hriattir a ni.

Meta chuan EU hi chhang ve nghalin, online classified listing service lamah an elpuite upbet nia an puhna chu finfihana an nei lo niin an sawi ve thung. Online marketplace dangte pawh an ṭhang chho reng a ni tiin Commission thutlukna siam hi an appeal dawn tih an sawi a ni. Meta elpuiten Facebook Marketplace siam chungchanga complaint an thehluh avangin Commission hian kum 2021 aṭang khan a chhui a, nikum khan a chhui hna hi a zo.

EU hian Meta hi a hma pawhin competition rules a zawm loh avangin sum chawi turin a lo ti tawh a ni. Kum 2017 khan WhatsApp a lei chungchangah information dik tawk lo a pek avangin Euro mtd 119 chawi turin a ti.

Irish Data Protection Commissioner pawhin user-te data a enkawl dan fel hlel avangin euro tld 1 chawi turin a ti a, UK Competition and Markets Authority (CMA) chuan Gif-maker Giphy lei a tum danah dan bawhchhiain a puh a, kum 2021 khan £ mtd 50 chawi turin a ti bawk.