Mustaine cancer hnuah mipui hmaah Megadeth an inlan leh

Megadeth chu an frontman  Dave Mustaine hrawk a cancer tih hriat­chhuah a nih hnua a ṭum­khatna atan Thawhṭanni zanah khan Hel­sinki, Finland-a  Hartwell Arena-ah an perform.

An perform-naah hian an hla lar tak takte pawh an sa a, chung zingah chuan 'Hangar 18', 'Peace Sells' leh 'Symphony of Destruction'-te pawh a tel.  Megadeth hian Five Finger Death Punch show an open sak a, heihi 2018 October-a  Yogyakarta, Indonesia-a an perform hnua mipui hmaa an inlan lehna hmasa ber a ni. Dave Mustaine hian nikum June thla khan cancer a vei thu leh enkawl a nih thu a sawi a, hemi vang hian nikum chhunga an tour neih tur zawng zawng pawh an ṭhulh vek bawk. Mustaine hian a cancer tih a puan hian an band chu an chawl dawn lo tih erawh a sawitel a,  2016-a an tihchhuah Dystopia chhunzawmna tur music buaipuiin studio lamah an lut reng tho tih a sawi.

Cancer a vei chung­changah hian Metallica-a a bandmate ṭhin James Hetfield pawhin message a thawn tih sawi tawh bawk a, a dinhmun chu a ngaihtuah hle tih a thawn thu a sawi a ni.

Megadeth leh Five Finger Death Punch-te hian February 20 thleng tour an nei dun dawn a, Budapest, Hungary-ah tour hi an khar ang.