Hlimhlimi Video thar a chhuak a pass lawmna erawh a ni lo!

Class XII first-a a pass lawmna ni chuang loin Hlimhlimi chuan music video thar a tichhuak leh ta a, he music video hi ama pual liau liau a pathumna a ni a, a vai chuan music video pali a tichhuak ve ta.

Hlimhlimi video thar hi 'Ka fak ang che' tih a ni a, Blue Waves-a record a ni a, video hi SVP kutchhuak a ni. A hla a dangdai a, jazz music lam a ni a, a nalh dangdai viau. Blue Waves recording neitu BZA chuan, "He hla hi a ṭha a, a nalh a, sumdawng rilru emaw, sum hmuh let ṭeuh tumin kan siam lo a, awm ve reng reng se kan duh vang a ni. Sumdawnna rilru ringawt nena music siam chu a ngai leh ngaiah kan kual a, music dangdai leh ṭha deuh hmuh tur a tam lo, mipui zinga hralh kal tur ringawt kan ngaihtuah fo avangin," a ti.

Hlimhlimi hi a naupan têt aṭanga zai ṭhin a ni a, tuna zai hmanga hriatlar a hlawh pawh hi a mak lo. Beginners Dept a nih lai aṭang tawhin a zai ṭhin a, Zoram mipuitena kan hriat ṭanna tak tak erawh chu kum 2011-a IMEM-in Gospel Singing competition a buatsaih aṭang khan a ni. Tuna a hla thar 'Ka fak ang che' tih chungchang hi Hlimhlimi chuan sawi chhuakin, "Sak a har ka ti. A hniam si a, mawi taka sak a ngai ve tho si a, hniam deuh chu sak nalh a har khawp mai," a ti. "A ngaithlatute tan chuan hniam chhir chher a ni ringawt a, a harsatna lai hriatthiam a har mai thei. Mahse hla hniam lutuk hi sak a har hle a ni," a ti.

A music video hmasa ber chu 'Ka lo hmu ta' tih kha a ni a, hemi hnu hian 'Thinlung' tih siam lehin, tuna mi hi a mimala a siam pathumna a ni. Parema album, 'Ka rinchhan Lalpa'-ah khan a zai bawk a, hei nen hian music video pali a nei ve ta.

Tunah hian video dang siam tum­in hma an la ṭan leh mek a, a video thar tur hi en a, ngaihthlak chak­awm tur chi a ni. "A dangdai dawn a, tunlai ṭhalaite duh chi, Pathian fak duhna rilru pu lem lo pawhin ngaihnawm leh hmuhnawm ti taka an ngaihthlak a, an thlir theih tur a ni ang. Mahse duh angin hma kan la la chak thei lo a, dance crew hman te kan tum a, kan choreographer tur hi Delhi-ah a la zin a, hma kan la la thei vak lo; a rawn haw ve leh kan siam nghal theiin ka ring," a ti.

Class XII kha First-ah a pass, Pachhunga University College-a zawm turin tunah hian Hlimhlimi hian admission a ti tawh a, Physiology a zir dawn.