Tetea 'Chawlhni tlai lên'

A hla thu hming aṭang pawh hian ngaihthlak a chakawm viau! Tetea, J&J tia kan hriat hmasak ṭhin, J. Lalthlengliana khan music video thar a rawn tichhuak leh ta a, a hla hming chu 'Chawlhni tlai lên' a ni.

Tetea hian tunah hian Ṭhazual top 10-ah hla pakhat a nei mek a, hlawhtlinna a chan chhoh zel a tum a nih hmel. Joseph-a nena an sak, Nuimawite tih hla chu Ṭhazual Lengzemah pakuanaah a awm mek laiin, Tetea hian hla thar dang a rawn tichhuak leh ta. He a hla thar hi 'Chawlhni tlai lên' a ni a, engtiang chiahin nge Chawlhni tlaia lên chungchang a sawi tih ngaihthlak a chakawm tawh viau.

A chanchin sawi dawn hi chuan J&J a sawi loh theih loh. A farnu Sentei nen J&J tih hmingin Zoram rimawiah an rawn langsar a, chumi hnuah thâwm thar em em an nei lo vang vang a, an rawn let leh a ropui hle. Sentei phei chu Ṭhazual chart-ah pakhatna vawi eng emaw zat a hauh nghe nghe.

Tetea hla thar hi ama phuah a ni a, hla phuah lamah talent a nei ṭha hle. Tetea hian hla eng emaw zat a phuah tawh a, a phuah zat chiah hi hriat fak a har viau nachungin hla 70-80 vel lai chu a phuah tawh a ni. A hla phuah hi aman a sa a, Sentei'n a sa bawk a, hei bakah zaithiam dangten an saksak nasa hle. Joseph Zaihmingthanga sak 'Min dawn ve rawh' tih te, T. Zonunmawia (Mapuia) sak 'Lenglerh min ti' tih te bakah, Min Ṭhen Long, I Zunzam, Min Dawn Ve Rawh tihte chu a hla kan hriat lar zual zinga mi a ni.

Tunlai, ṭhangthar zawk, naupang zawk, mu­sic leh video bungrua ṭha zawkah hlawhtlinna a rawn chang leh thei a, amah Tetea pawh a lawm hle. "Tunlaia video chhuak a ṭha hlawm a, zaithiam pawh an ṭha a, hetiang kara tun dinhmun ka thleng leh thei hi inbeisei a har duh khawp mai," tia sawiin, Zo rimawi huang chhungah pawh inelna a sang a, zaithiamte an ṭang em em tawh a, hetiang karah hian hlawhtling tur chuan theihtawp chhuah a, ṭan a ngaih thu a sawi.