Man Booker Prize dawngtu László Krasznahorkai

Ziak mite inchawimawina ropui leh an ngaihsan, kum khat dana an sem ṭhin, Man Booker International Prize chu puan a ni a, Hungarian writer, László Krasznahorkai chuan a dawng.

Man Booker International Prize hian pawisa fai £60,000 a keng tel a, lehkhabu khawvelah chuan he chawimawina dawn hi hlawhtlinna ropuia ngaih a ni. Ziaktu fam tawhte hnenah he chawimawina hi an hlan ngai lo a, a damlai ngaite hnenah chauh pek a ni ṭhin. Kum 2005 khan Ismail Kadare chuan a dawng a, kum 2007-ah Chinua Achebe, kum 2009-ah Alice Munro, kum 2011-ah Philip Roth leh kum 2013-ah Lydia Davis ten an dawng.

László Krasznahorkai hi kum 1954-a piang a ni a, kum 1985 khan Satantango tih lehkhabu a tichhuak a, hei hi khawvelin a hmelhriat ṭanna a ni. Kum 1993 khan a lehkhabu The Melancholy of Resistance avangin literary work lama chawimawina, German Bestenliste Prize a dawng a, hei bakah hian Hugary-a thuziak lama chawimawina sang ber Kossuth Prize a dawng tawh bawk. Kum 2013 khan László Krasznahorkai leh a lehlinsaktu, George Szirtes te chu Independent Foreign Fiction Prize dawng tur âwm zingah longlist an ni tawh a, hei hi a lehkhabu Santantango vangin a ni. Satantango avang hian US-ah chuan a kum zawnin Best Translated Book Award a lo dawng tawh bawk.

Man Booker International Prize hi kum khat dana sem ṭhin a ni a, kuminah hian Marina Warner chair-na hnuaiah mithiam tak takten a dawng tur hi an thlang a ni. Man Booker Prize for Fiction a awm leh a, hei hi chu kum tina sem ṭhin a ni a, Booker-McConnell Prize tia sawi ṭhin a ni. He chawimawina dawng tur chuan Sapṭawnga ziah a ngai a, UK-a an publish a ngai bawk. Man Booker International-ah hi chuan Sap ṭawnga tihchhuah emaw, Sap ṭawnga lehlin pawh pawm a ni a, a publish-na hmun erawh khawi hmun pawh pawm a ni. Kumina Man Booker International dawng tura rawt chhuah zingah hian India mi, Amitav Ghosh pawh a tel.