Mizo Idol Judge thar pahnih
June thla aṭanga intihsiakna neih ṭan tur, Mizo Idol-ah kumin hian judge thar pahnih kan hmu ang. Judge ni ṭhin aṭangin Rinzauva Sailo chauh kan hmu zui dawn a ni.
Judge ṭhin Rebecca Saimawii leh Robin Remruata te kumin Idol-ah kan hmu zui tawh dawn lo a, Makuri hi a pasal damlohna avanga ṭhu zui thei tawh lo tur a nih hmel viau a, a uiawm dawn khawp mai. Robin-a hi kohhran thil lamah buaina tur a neih avangin a tir aṭangin a ṭhu thei dawn lo a, a tawp lamah guest judge angin kan hmu zui tho ang em tih erawh a la hriat loh. Robin-a hi England-ah zaipawl hruaiin an zin dawn a, inbuatsaih vanglai leh Idol Elimination Round a inrual chho ang a, chungte avang chuan judge-ah hian a hmel kan hmu dawn rih lo a ni.
Judge thar tur hi pakhat chu Zoramin music khawvela kan hriatlar sa, tuna Lunglei nu ni mek, Mimi Renthlei a ni. Zai lamah chuan kan hre lar tawh a, judging panel-ah hian kan la hmu tam vak lo a, mahse hemi avang hian experience nei lo chu a ni miah lo; school leh inelna lian tham vak loah chuan judge-ah a lo ṭang fo tawh a ni.
Mimi chuan, "Mizo Idol judge tura min rawn bia hi ka lawm a, ka phur tawh khawp mai. Ram pum huap show-a judge ka nih hmasakna ber tur a ni a, a hmain inelna eng eng emawah chuan judge-ah ka lo awm tawh ṭhin a, ram pum huap show-a ka tel tur hi ka phur tawh khawp mai," a ti. "Zonet-in hetianga zaithiam leh talent nei ṭhate tana inphochhuahna hun ṭha a siam hi a lawmawm ka ti a, zaithiamte tan chuan a hlu hlein ka hria," a ti bawk.
Judge thar tur dang hi Mizo zingah chuan music lama ril pawl tak a nih a rinawm. Bial zaipawl intihsiak neih taka Chawnpui Pastor Bial Zaipawl conductor Lalsiamkima kha a ni. Music khawvelah chuan experience nei ṭha pawl pawh kan ti thei ang; Chennai-ah Western Music Grade 8 a zo a, chumi hnuah, kum 2011 khan Singapore-ah Bachelor of Music a zo leh tawh a, hmun hrang hrangah zaipawl training velah te trainer tura an lo koh fo tawh a ni. Synod Music Committee an indaih loh changa music-a training pe tura an koh ve zeuh zeuh ṭhin a ni a, judge atan chuan iaiawm loh ber zinga mi a ni ang. Tunah hian Aizawl Theological College-ah Music bik a zirtir mek.
"Idol judge-a min rawn sawm hi a lawmawmin a phurawm ka ti a, he dinhmun hi dinhmun sang tak niin ka hria. Theihtawp ka chhuah ang," a ti. "Mizo Idol hi a ṭha ka ti a, talent inphochhuahsakna hmun ṭha tak a ni. Amaherawhchu kum dangah te music hi a kal khat deuh, a style a tam lo deuh mah mah ṭhinin ka hria," a ti.
Mizo Idol intihsiak hi June thla aṭanga neih ṭan a ni ang a, kum 15 aṭanga kum 30 inkar Mizo tawh phawt chu a tel theih. Form hi Zonet Office, Zarkawt aṭangin a lak chhuah theih a, May 30 thlengin a thehluh theih.