Prince Harry dinhmun a chiang ta lo

US-a legal expert-te chuan an rama khawsa mek, England lal fapa, Prince Harry, Duke of Sussex chuan a visa-ah a chanchin a ziah kim loh vangin Donald Trump president a nih hnuah thawn haw tura tih zingah a tel maithei tih an sawi.

Beverly Hill attorney, Alphonse Provinziano chuan Harry hian Donald Trump-a USA president a nih chhung chuan deportation chungchangah a buaipui a ngai maithei tih a sawi. Court chuan a visa document ti chhuakin, ruihhlo a lo tih tawhte chu a ziak tel em tih enfiah an tum dawn a ni, a ti. Visa an dil lai hian ruihhlo an tih leh tih loh chungchang sawichian a ngai a, Harry hian a lehkhabuah cocaine, marijuana leh psychedelic mushroom te a lo ruih tawh thu a sawi ngei a, hei hi visa-ah a ziah lan loh chuan a chanchin zepah puhin, sorkarin thawn kir tuma a nawr theihna chhan a tling dawn a ni. President Joe Biden-a kaihhruai sorkar chuan Prince Harry hi a humhim tlat tung a, Heritage Foundation-in a visa chungchang information kimchang an dilna pawh an hnawlsak a ni. Mahse Trump-a'n White House a luh hunah chuan a dan a dang tawh maithei thung.

Trump hian dan dik tak ni loa USA-a lutte chu thawn kir leh vek a tiam a, hei vang hian Prince Harry dinhmun pawh hi zirchian tur zingah a tel hmel a ni.