Fashion Fiesta
Incheina tunlai leh dangdai ber berte kan sawi ta fo mai a, a hmei a pa inchei dan tur pawh a tunlai ber ber kan sawi awl lo. Kan hre hne hlei hlui anih loh tal pawhin kan zawm seng kher lo ang a, chutihlai chuan thawmhnaw ṭhenkhat hlui thei lo leh chul thei lo, design hrang hrang lo chhuak karah pawh danglam ve lo kan la uar reng tur leh, abikin khawvela mihring kan awm chhunga kan inbel reng tur Shirt (Kamis) hi kan lo ngaihtuah ngai emaw.
Mipa Wardrope-ah hi chuan pakhat tal a inkhai ngei ngei turah ngai ila, hmeichhe lamah pawh ngaina fe fe kan tam. Kawngsir sale aṭanga designers brand a ni emaw, a puanthan te leh a design tlema a danglam deuh te anih loh chuan Shirt (Kamis) kan hriat tlanglawn dan ber hi chu nghawng nei, a hma phel, kawrkilh awm hi mi tam zawkina kan hriat dan chu a ni tlangpui. Amaherawhchu, sap ṭawng (English) te anga kan ṭawng te a hausak ve tawk loh avangin heng Kamis lam hawi hrim hrim hi chu Shirt tiin kan sawi tlangpui ṭhin. Kan inbela te a hming hre lem lova kan inbel tak chawt chawt pawh a tam. Tun ṭum chu Shirt chi hrang hrang han thlirho dawn teh ang.
Flinders Petrie-a chuan Isua pian hma kum 3000 daih tawh khan Egypt khaw pakhat an tiha thlan chhungah tunlaia Shirt (Kamis) kan tih tak ang hi a chhar chhuak nawlh mai a, hei hi kan hriat theih china Kamis kan hmelhriatna hmasa ber a ni awm e. Kum Zabi 20-na chhoah chuan incheina thawmhnawa ngaih a ni ngai lo. Chung hunlai chuan kawr hnuai chi khata ngaih a ni ṭhin a, a chungah kawr pangngaite hak hnanin kum Zabi 18-na chhoah phei chuan mipa ten Kamis fual deuh hnelhhnawlh mawng khuh an hak chuan a hranpaa kekawrte hak ngaiah an ruat tawh lo. Dik tak chuan khang hunlai kha chuan Jail tangte leh beram vengtute leh mi hnuaihnung zawkte hak tawk velah an ngai ṭhin. Khang hunlaia Shirt kan tih ho kha chu a nghawng leh ban hmawr vela lace kir deuh chhip chhep te nena ṭhui pawlh a ni tlangpui ṭhin. Rawng danglam deuh hlek kan hmuh ṭanna chu kum Zabi 19-na lai vela Jeorge Caleb Bingham-a milem ziah aṭangin a ni a, kum 1920 a nih meuh chuan mi nawlpui incheina a ni chho ta a ni.
Europe leh America lamah chuan hmeichhe lamin kum 1860-a Garibaldi Shirt an tih mai, Kamis sen lar vat mai, Garibaldi siam chhuah chu an uar chho hle tawh a ni. France ram Lalnu Eugenie-tihlar a ni nghe nghe a ni. Hemi hnulam aṭanga vawiin thleng hian engtiang chiaha rawn lar chho ta nge a ni tih hi sawi vak ngai lovin kan incheina tlanglawn ber anih aṭang hian kan hrethiam mai awm e.
Shirt chi hrang hrang kan hriat theih te hi a tam hle a, kan sawifiah vek seng lovang. Mizo tena kan hriat tlanglawn deuh deuh chauh han tarlang dawn ila :
Dress Shirt : Mi nawlpuiina kan hmelhriat Kamis pangngai kan tih ang chi ho, nghawng nei, ban tlawn, a hma phel, a hma sira ipte awm, a mawlmang thei ang ber sawi nana hman a ni ṭhin.
Camp Shirt : Kamis fit lo pian ngil thla tawp, ban bul, a hma phel sawi nan hman a ni tlangpui.
T-Shirt : Tee Shirt tih te pawn a tam zawkin kan hmelhriat awm e. Nghawng leh a hma phel awm lo, a tlangpuiin tlema puan fan hman a ni ṭhin. Ban bul leh kawr dang hnuaia hak a ni tlangpui ṭhin.
Polo Shirt : Tennis Shirt emaw Golf Shirt tih te pawha sawi pawlh a ni fo ṭhin. Ṭhalai lam Kamis ngaina, Smart lutuka inchei loh tuma hak tlanglawn berte zinga mi a ni awm e. Puipun leh chhuahvah satliahah a hman kawp theih avangin mipa lamin an ngaina hle a ni.
Henley Shirt : Polo Shirt kan tih ang chi tho, a hma tlem inhawng, Kamis nghawng ang ni si lo, a ban tlawn, puan fan lam deuh a ni tlangpui.
Plaid Shirt : Plaid kan tih chuan kan hrethiam vek awm e. Kamis rang/ṭial rawng chi hnih/thum vel inpawlh sawi nana hman ṭhin a ni.
Tunic Shirt : Hmeichhe lam inbel ṭhin a ni tlangpui, Kamis nghawng ang nei, a hma inphel tlang lo, mawng khuh, fual lam deuh hlek, ban tlawn, hmeichhe tam takin Office kal leh chhuahvah naa an hak tlanglawn ber ang chi hi a ni.
Night Shirt : Tunic nen a inang deuh thuak a, amaherawhchu a hlanga hak a ni tlangpui a, zan mutpui atana hman a ni ṭhin.
Tluangpuii Hmar
Instructress
Vakiria Institute of Fashion Technology