NSA-in Google app store hack a tum!

Hei hi chu i himna atan a pawi pha ve tlat! US-in man a duh em em, Russia-in inhumhimna a pek, Edward Snowden-a document aṭanga a landanin US-a National Security Agency chuan Google app store hack a tum ṭhin a, tunah hian a la tum zel em tih erawh a hriat loh.

Hindustan Times-in a tarlan dan chuan NSA hian Google leh Samsung tena an hman app store-ah hian a hmangtu smartphone-a lut thei turin spyware siam an tum niin Ningani khan a tarlang. US hian a thurualpui ram dang, Britain, Canada, New Zealand leh Australia te nen hetiang ruahmanna hi an siam a ni. Heng ram pangate hi Five Eyes tia sawi ṭhin an ni.

Hetiang ruahmanna hi kum 2011 leh 2012 khan sawiho fe a ni tawh a, a project-ah hian Irritant Horn an vuah a, Google app store kaltlangin smartphone-a malicious software (malware) luhtir a, chumi hmanga data lakkhawm an tum a ni.

NSA hian an tinzawn bik deuh ram chu Africa lam a ni a, a bikin Senegal, Sudan leh Congo te a ni a, hei bakah hian France, Cuba, Morocco, Switzerland, Bahamas, Netherlands leh Russia te pawh an tinzawn zingah hian an tel. Google app store hi tunah hian Google Play kan tih hi a ni.