Box Office: No 1-ah beisei pha lo 'Red One'

Amazon MGM film thar, 'Red One' chu tlangzarh karah North American box office-ah No 1 ni mah se, a sum hmuh zatin beisei a pha lo hle.

Dwayne "The Rock" Johnson leh Chris Evan te channa, 'Red One' hi theatre 4,032-ah tih chhuah niin USD mtd 34 a la lut a, mahse a budget hi USD mtd 250 zet a ni thung. CinemaScore-a audience ten A- an pek laiin, critics lam erawh chuan an fak lem lo. Amazon MGM chuan an large-budget film hi box office lamah beisei angin che ṭha nghal vut lo mah se, streaming lamah advantage an nei niin a la ṭang ve thung a, Prime Video aṭangin sum tam tham tak an la hmuh theih an beisei. Amazon Prime Video hian khawvel pumah subscriber mtd 250 zet a nei.

'Venom : The Last Dance' chu a la che ṭha zel thung a, No 2-ah awmin USD mtd 7.4 a lak luh belh. North America-ah USD mtd 127.6 a la lut tawh a ni. 'The Best Christmas Pageant Ever' leh 'Heretic' te pawhin an dinhmun ngai an la luah chhunzawm bawk.

Kar liamta chhunga North America box office sum hmuh hi nikum hemi hun anga a sum hmuh chhuah aiin 12% in a tlem zawk. Mahse "Wicked" leh "Gladiator II" tih chhuah hmabak a awm a, box office dinhmun pawh a rawn sawi danglam hle rin a ni.

'Gladiator II' hi North America-ah November 22 hian tlangzarh a ni dawn a, mahse UK, Spain, France leh ram dangah erawh tih chhuah a ni tawh. Tlangzarh karah international box office-ah USD mtd 87 zet a la lut a, North America lamah pawh chhuah a nih hunah boruak a nei lian hlein a rinawm.