Trump thlawptu tiin Kim K an sel

Reality TV star, Kim Kardashian in a instagram-ah a Tesla robot a post chuan online lamah inhnialna a siam nghal a, tam tak chuan Donald Trump thlawptu niin an sawisel.

Tesla hi X neitu, US President thlan dawna Trump thlawptu langsar tak, Elon Musk ta a nih avangin, Kim K-in Tesla robot a post hi Democrats ṭantu lam chuan an helh nghal ringawt a ni. Kim hian video post-in Tesla Optimus Robot chu a ṭhian thar tiin a sawi a, a robot neih thar chu a lawm hmel a, 'cute' a tih thute pawh a sawilang. He robot man hi USD 20,000 - 30,000 vel nia sawi a ni. US President thlan dawn khan celeb tam takin Democrats candidate Kamala Harris thlawpin an campaign pui nasa hle a, mahse a tling zo ta lo. Celeb ṭhenkhat chuan Trump a tlin chuan US chhuahsan a, ram danga an pem tur thute pawh an sawi. Hetianga sawitu zingah hian Cher, Sharon Stone leh Barbra Streisand te pawh an tel a, mahse tun thlengin an la pem chuang lem lo. President atana Donald Trump thlan tlin a nih hmasak kum, kum 2016 pawh khan Whoopi Golberg, Miley Cyrus, Amy Schumer, George Lopez leh mi dang ṭhenkhat pawhin Trump a tlin chuan US chhuahsan an tum thu an sawi a, mahse US an chhuahsan ta chuang lo a ni.