TBC-an Ṭhazualah record a rawn siam

Bethsy-in pakhatna a hauh a, Betea a dawta a awm mek lai khan TBC Zaithanpuia hla 'Min tlan ta' tih hla hi palinaah daih a awm. Zoram Electrical Store Ṭhazual chart thar an rawn tihchhuah leh meuh chuan pakhatnaah a rawn zuang kai dawrh thei.

TBC-a hla 'Min tlan ta' tih hian Ṭhazual chart-ah record a siam a, Ṭhazual chart tihchhuah tawha pakhatna ni rang ber a ni. Tun hi Zoram Electrical Store Ṭhazual chart-a ṭum hnih a lanna chauh a, a vawi hnih lannaah pakhatna a hauh thei. Hei hian TBC Zaithanpuia zaithiamzia leh a ropuizia a tarlang. He hla hi J. Vanlalhruaia phuah a ni a, a phuahtu hi TBZ Zaipawla an conductor ni lai a ni.

A tir aṭang rengin 'Min tlan ta' tih hla hi a hit nghal a, hetianga a hit nghal chungchangah TBC-a chuan, "Ka beisei lo chu a ni chiah lo a, a hlawhtlin chu ka ring a, mahse heti em em erawh chu ka lo ring lo," a ti. "He hla hi Pathian hnenah ka hlan nasat ber hlate zinga mi a ni a, a video-ah pawh hian kan seng hnem a, kan uluk," a ti.

A hmasaa pakhatna, Bethsy chu pahnihnaah a chhuk a, Betea chu pathumnaah a chhuk thung. Bethsy, Pensy leh Temi Sailo te hla thar 'Mamawh chhanna Lal Isua' chu palinaah a rawn lut nghal. One in Christ hla 'Ka zai ang' tih chu panganaah a rawn kai chho.

Zoram Electrical Store Ṭhazual
10 Temi Sailoi - Kraws thu
9 Lalruatfeli Bawitlung feat Project Fishtail - Kross vangin
8 Maggie - Hmangaihna par tlanin
7 Hlimhlimi - Ka fak ang che
6 Grace Lalchhanhimi - Aw ropui ber
5 One In Christ - Ka zai anga
4 Bethsy, Pensy, Temi - Mamawh chhanna Lal Isua
3 Betea - Lungchhir a sawt lo
2 Bethsy - Min hmangaih si a
1 TBC-a - Min tlan ta

TBCA leh Kelkang
TBC Zaithanpuia leh Gospel Music Ministry-a an hruaitu ṭhenkhatte Kelkanga harhna chhimin an kal a, nimin khan Aizawl panin an rawn lêt. Kelkangah hian TBCA bakah Isaak Malsawmtluanga te, Hriatpuia te, Nunu VL Neihthangi te, Hlutei te, Evelyn Pachuau, Temi Sailo, Davida, Hriatpuia, Zomuana, Chhantea, AB-a te ho an kal a ni.
TBCA chuan, "Kelkang hi ka pianna khua a ni a, tun thlengin Kelkang bul Dilkawnah kan inpui ber pawh a la awm. He hmun hi Pathianin tunah rih chuan a hmun thianghlima a thlan a ni. Rilru tlâwm tak nen lo chuan kal chi-ah ka ngai lo. Kelkangah chuan mi ropui bik an awm lo a, tupawh mai hi kan intluk tlang vek a ni. Mimalin Pathian kan duhna kha a pawimawh ber," a ti. "Pathian zarah kan beisei aiin kan hlawkpui a, Pathianni zante phei kha chuan zing lam thlengin kan ṭawngṭai a ni," a ti.