Sabrina MV siamna biak-in puithiam a hna chawlh tir

Sabrina Carpenter-in kum 2023-a music video, 'Feather' a siam ṭuma a music scene ṭhenkhat an siamna, New York-a Our Lady of Mount Carmel Church-a puithiam chu pastor hna aṭangin chawlh tir a ni.

Roman Catholic Diocese of Brooklyn chuan thuchhuah siamin, biak-in chhungah scene mawihnai lo taka siam phalsak leh, sum a enkawl danah thil fel tawk lo a awm thu sawiin, hengte hi an chhui chian hnuah monsignor Jamie Gigantiello chu pastor hna a thawhna kawng a mawhphurnate hlih sak a ni tih a tarlang. A thlaktu tur pawh ruat nghal a ni bawk. Carpenter music video-ah hian biak in chhunga Isua khenbeh lai lem dahte ti langin, maichamah kawr dum chhing tak ha chunga a lam laite pawh a awm.