Netflix-ah Aryan Khan debut series

Netflix chuan Red Chillies Entertainment nena thawk dunin, nakkumah Bollywood special series an ti chhuak dawn tih a puang a, a title erawh an la sawi lang lo. He series hi Bollywood superstar, Shah Rukh Khan fapa, Aryan Khan-a'n creator leh director a nih anga a kutchhuak hmasa ber tur a ni.

Aryan Khan debut series hi film industry chungchang niin, SRK pawhin a fapa kut chhuak hmasa ber Netflix-a pek chhuah a ni tur hi an phur thu a sawi lang. Aryan Khan hian film industry luh chilh mah se, a pa hnung zuia actor lama kal thlang loin filmmaker nih a thlang thung a ni. A farnu, Suhana Khan erawh acting lamah a kal thung. Aryan Khan project hmasa ber hi a nu, Gauri Khan produce a ni.