Taylor Swift bawkin ro a rel Katy Perry aiin Metallica an chungnung

Tunkar Billboard 200 chart-ah Taylor Swift 'Folklore' bawkin ro a la rel a, kar ruk hnuah pawh US-ah hralh a la kal ber a, tluk thei an la awm lo a ni.

Nielsen Music/MRC Data aṭanga a lan dan chuan kar hmasa chhung khan album equivalent unit 90,000 a la hmu chhuak thei a, US mipuite chuan Taylor Swift album hi an lei nasat bakah an la ngaithla nasa hle.

Taylor Swift hian album unit a hmuhchhuah aṭanga 51,000 hi album sales aṭangin a a ni phak a, a dang erawh hi chu SEA leh TEA units a ni thung. 

Taylor Swift hi kum li dawn chhunga Billboard 200 chart-a No.1 ni thei rei ber a ni ta a, Drake kha kum 2016 khan kar 13 chhung No.1 a ni a, chumi hnua ni rei leh ber chu Taylor Swift hi a ni tawh.

Folklore hmang hian Swift hian Whitney Houston record lo siam tawh chu a rawn nihrual chiah a, a album dang No.1 a nihpui tawh zawng zawng nena Billboard 200 chart-a No.1 dinhmuna a din chhung chu kar 46 a ni tawh a, chu chu Houston record lo siam tawh zat chiah kha a ni. Swift hi tunah chuan sawi nep rual a ni tawh lo.

Houston khan album pali chart No.1 a nihpui a, chung album zawng zawng chart No.1 nih hun chhung chu kar 46 chiah niin hmeichhe zingah chuan a tam ber a, Swift hian a rawn nihrual ta chiah a, history siam tur pawhin a dinhmun a ṭha sawt hle.

Swift leh Houston dawtah hian Adele chu a awm a, Adele chart No.1 nih belhkhawm hi kar 34 a ni thung. Hetihlai hian chart top rei ber chu The Beatles kha an ni a, album hrang hrang chart No.1 an nihpui zat belhkhawm kha kar 132 lai a ni.

Metallica live album thar, San Francisco Symphony nena concert vawi hnihna an neihna S&M2 tia an tihchhuah chu palina a ni a, album equivalent unit 56,000 an hmu chhuak niin Nielsen Music/MRC Data chuan a tarlang.

Katy Perry album thar 'Smile' chu No.1 a ni zo lo a, chumai ni loin Top 5-ah a lang pha ṭawk. Mi tam tak beisei a phak lo deuh pawh a ni mai thei. Perry hian a album thar aṭang hian album equivalent unit 50,000 a hmu chhuak a, Metallica hnuaiah din a ngai ta a ni.

Pop Smoke 'Shoot for the Stars Aim for the Moon' chu pahnihna bawk a ni leh a, Juice WRLD 'Legends Never Die' pawh pathumna bawk a ni leh. 'Hamilton: An American Musical' pawh kar 258 chart-ah lang tawhin parukna a la ni phak bawk a ni.

1    "Folklore"     - Taylor Swift 

2    "Shoot for the Stars Aim for the Moon"     - Pop Smoke

3    "Legends Never Die"     - Juice WRLD 

4    "S&M2"     - Metallica 

5    "Smile"     - Katy Perry 

6    "Hamilton: An American Musical"     - Various Artists

7    "My Turn"     - Lil Baby 

8    "Pray 4 Love"     - Rod Wave 

9    "Blame It on Baby"     - DaBaby 

10    "B4 the Storm"     - Internet Money