Ṭhazual Awards Zai tur leh lâm tur an puang

Tunkar Ningani zan dar 8 aṭanga darkar khat leh a chanve awh tur Ṭhazual Awards show-a zai tur leh lâm tur puan chhuah a ni a, Gospel leh lengzemah pali ve ve an zai ang a, Faklam leh MSL Dance Battle-a mite lâm kan hmu bawk ang.

Ningani zan hian Hawl Auditorium, Treasury Square-ah Ṭhazual Awards hi sem a ni dawn a, hetah hian tunlaia lengzem huang chhunga zaithiam kan neih ṭhat ber ber - C. Sanga, DJ Lalvenhimi, Essy leh Sentei te an zai ang a, Gospel lamah pawh kan neih ṭhat - TBCA, Hlimhlimi, Grace leh Hmingtea te an zai ang.

Hei bakah hian show hmuhnawm tak kan hmu dawn a, a tihmuhnawmtu tur chu Mission Veng Branch KṬP-in Faklam Intihsiak an buatsaiha pakhatna, Ramthar Veng Branch KṬP te an lam ang a, hei bakah MSL Dance Battle neih zawh taka dance crew ṭha ber dawttu MynX te an lâm dawn bawk.