Mizo Idol form la chhuak an tam

Zonet-in Mizo Idol a buatsaih leh turah tel tuma form la chhuak an tam hle tawh a, mi 700 chuangin an la chhuak tawh. Form hi May 30 thlengin Zonet Office-ah thehluh theih a ni a, hemi hnu lama lut chu pawm a ni tawh lo ang.

Mizo Idol-ah hian Mizo tu­pawh, kum 15 aṭanga kum 30 inkar tan tel theih a ni a, kum 2013 hnua Cable TV ten intihsiakna an buatsaiha top 10 chin tan Elimination Round an tlang sa a, Elimination Round hi First Round-a chhiar nghal a ni. Mizo Idol intihsiaknaa lo tel tawh, top 50-a tling chin tan Third Round aṭangin an ṭan ang. Form la chhuak tawhte zingah hian Radio artist-te pawh an awm nual.

Cable TV intihsiaknaa lo tel tawhte tan hian a proof-na lehkha thil tel tur a ni dawn a, thil tel lote chu pawmsak an ni lo ang.

June 1 hian zai dan tur hi Zonet Office hnuaiah tar chhuah a ni ang a, hetah hian Elimination Round-a zai ngai lote pawh tarlan tel a ni ang. Zai dan tur hi Facebook-a Mizo Idol page-ah tarlan nghal a ni dawn bawk a ni.