Beisei aiin The Croods: A New Age a che ṭha
Thanksgiving hi kum dangah chuan film lar tak tak tlangzarh hun a ni ṭhin. Kumin erawh hripui a leng miau a, kumdang angin film ṭha an tlangzarh tam ngam lo. A hâi tur erawh an ngai ngam lo a ni ngei ang, Universal leh DreamWorks chuan The Croods: A New Age hi an tlangzarh a, North America Box Office chart-ah No.1 a rawn ni nghal.
The Croods: A New Age chu
Kum 2013-a tlangzarh The Croods chhunzawm computer animated comedy film The Croods: A New Age hi Nilaini hmasa khan US-ah tlangzarh a ni a, chart-ah pakhatna a ni hi a mak loh rualin beisei aiin sum a lalut hnem thung.
The Croods hian tun kartawpah khan theatre 2,221 aṭangin $9,710,000 a lalut. US-ah ringawt hian $17,010,000 lai a lalut tawh a, khawvel ram dang aṭanga a lakluh nen $37,805,000 a lalut tawh. Hrileng kara film tlangzarh zinga sum lalut tam ber pawl a ni der tawh.
Thanksgiving hunlai vela film tlangzarh sum lalut tlem ber ni mah se tunlai boruak nena thlir chuan a sum lakluh hi a ṭha thawkhat hle. Aw thawhtu pawh an ṭha hle a, Nicolas Cage, Emma Stone, Ryan Reynolds, Catherine Keener, Clark Duke, leh Cloris Leachman-te'n aw an thawh leh bakah mithar Peter Dinklage, Leslie Mann, leh Kelly Marie Tran-te pawhina an aw an thawh a ni.
Freaky leh The War With Grandpa
Chart hnih a zawna pakhatna a nih hnuah Freaky chuan a dinhmun ṭha a hum zo ta lo a, The Croods: A New Age ngam loin pahnihna a ni. Comedy horror film hian Theatre 1,735 aṭangin $770,000 a lalut.
Comedy film The War With Grandpa chu pathumna a ni bawk a, theatre 1,500 aṭangin $643,937 a lalut ve bawk a ni.
Film panga theatre sang chuangah an chhuah
Kar tawp liam taah khan film panga chiah theatre sang chuanga chhuah a awm. Sum lalut tam zual pathum bakah hian palina Let Him Go leh pangana Come Play-te chu theatre sang chuangah an chhuah a ni.
Japan Box office Demon Slayer > Titanic
Japan ramah chuan Demon Slayer The Movie: Mugen Train a hit tluang zel a, Titanic-in an rama sum a lo lakluh tawh chu a khum tawh niin Aniplex chuan Thawhṭanni khan an puang.
Gotoge Koyoharu manga behchhana siam Anime movie hian format hrang hrang aṭangin copy maktaduai 100 an hralh tawh. November 29 thleng khan $maktaduai 264 lai sum a lalut tawh a, ni 45 chhungin hetiang zat hi a lalut a ni.
Titanic khan Japan-ah hian 1997-a tlangzarh a nih aṭang khan $mtd 251 a lalut a, Demon Slayer hian a rawn khum ta a ni.
Box Office Top 10:-
1 The Croods: A New Age $9,710,000
2 Freaky $770,000
3 The War with Grandpa $643,937
4 Let Him Go $459,000
5 Come Play $389,000
6 Honest Thief $350,000
7 Elf (2020 Re-release) $320,000
8 Tenet $300,000
9 The Santa Clause (2020 Re-release) $170,000
10 National Lampoon's Christmas Vacation $170,000
(2020 Re-release)