October-a download tam ber Threads

Meta-in X (Twitter ni ṭhin) el tura social media, microbloggin service a siam, Threads chu October thla chhunga iOS a app download tam ber a ni. September thla pawh khan download tam ber a lo ni tawh bawk.

Kum 2023, July 5 khan official-a tlangzarh a ni a, ram 100-ah hman theih a ni tawh. A hmangtu pawh an pung chak hle a, tunah hian khawvel huapin user hi mtd 275 a nei tawh a ni.

Meta in a report danin, kumin August-September chhung khan Threads user hi mtd 100 velin an pung a, November thlaah sign-up thar hi mtd 15 an awm tawh bawk. Hei vang hian user hi mtd 300 a neih tlin thuai rin a ni.

Threads in hma sawn viau mah se a elpui, X erawh a la el pha lo hle thung. X hian thla tina active user a neih hi mtd 500 chuang an tling. Threads hi download tam ber ni mah se, a download tu zawng zawng hi active user an ni zui kher em tih a hriat loh a, tam tak chuan enchhinna atan download-in, a hnuah X leh Instagram zawk an hmang zui leh pawh a ni maithei.

Tun hnaia US President thlanna nghawng zelah, Donald Trump duh lotu titau ten X chhuahsana Bluesky zawk an hman tur an sawi hnuah Bluesky hmangtu pawh an pung chho a, mahse active user hi mtd 20 vel chauh an la awm thung.