Zaninah Lelte Award 2024 Gospel zan

Mizo music award hlun ber, Lelte Award vawi 33-na chu zanin aṭangin sem a ni dawn. Award hi Gospel leh Lengzem ah thliar hran niin, zanin hian Gospel zan hman a ni ang. Zonet Bawhbel, LPS 10 leh Lelte YouTube channel-ahte live-a pek chhuah a ni ang.

Dawrpui Multipurpose Hall-ah dar 7 aṭangin hun hman a ni dawn a, Gospel bikah hian category 14-ah award hi sem a ni ang. Zanin hian gospel artist kan neih ṭhat takte an perform dawn bawk. Zanina perform turte hi - Faktu, Israela Pachuau, Vanlallawmawmin, Jonathan Lianhna, Laldinsangi, Zoramchhanin, Lalduhsaki bakah Ramhlun Pastor Bial Kohhran Pavalai Pawl an zai dawn bawk a ni.

Zanin hian zaithiam famtate sunna hun hman a ni nghal dawn a, zanina sun turte chu - Vanhlupuii, David Rualthankhuma, Rodingliana, Lalhmangaiha MALTA, K. Kawlramthangi, Kawlthanmawii, Biaklara leh R. Lalrinawna (Jeff) te an ni.

Gospel zanah hian Zohnahthlak Award sem tel a ni dawn bawk. Zohnahthlak Award hi Zofa hnam peng hrang hrang aṭanga anmahni community-in zaithiam an lo thlan chhuahte hnenah pek a ni dawn a, award panga sem a ni ang.