Crusaders' Night hman a ni dawn

Mizo Gospel Rock Band lar, 1980's chhoa lar leh ngaihsan hlawh tak ṭhin, Crusaders band pualin zanin, November 22, 2024 zan hian Chaltlang Kohhran Centenary Hall-ah Crusaders' Night (Musical Crusade) neih a ni dawn.

Crusaders band hi December 7, 1975-a din a ni a, original line-up chu Sanglianthanga, Lalropuia, Lalrammawia, Thangkima leh Khawvelthanga te an ni. Mizo evangelist lar, Rev Dr. Lalchungnung nen inkawpin Mizoram hmun hrang hrang leh ram pawnah Pathian rawngbawlin an feh chhuak nasa hle. An hlate hian Zoram dung leh vang an lo luahkhat tawh ṭhin. Hla 200 chuang neiin sap hla thlengin an phuah a, an hla eng emaw zat chu ṭawng hrang hrangin lehlin a ni bawk.

Crusaders' Night (Musical Crusade) ah hian an hun laia an hla, Pathianin a hman tak takte an sa leh dawn a, Jonathan Lianhna leh Issac ten an sa dawn bawk a ni. Upa C. Lalzarmawia, Reuben, Sangtea Ronald bakah musician ṭha tak takten an puibawm dawn a ni. Pathian fak leh chawimawina huna hman tum a ni a, ṭhangthar Pathian faka rawngbawl tuten Pathian thiltihtheihna leh nunga zaia Lalpa rawng an bawl zel theihna atana buatsaih a ni.