Angela Merkel Khawvela hmeichhe thiltithei ber

Business chanchinbu lar Forbes chuan kum 2015-a khawvela hmeichhe zinga thiltithei ber ber a tar chhuak leh a, chung zingah chuan German chancellor, Angela Merkel chu khawvela hmeichhe thiltithei ber, pakhatna a ni.

Merkel hi tunah hian kum 60 mi a ni ve tawh a, mahse a thiltihtheihna hi a la nep chuang lo. Tunah hian Germany-ah a term thumna a chelh mek a, Germany-a ro a rel aṭang hian Germany chu Europe-a economy lian leh hmahruaitu a ni a, khawvelah pawh Germany chu ram ropui berah a hlangkai a ni. Amah hi Leipzig University aṭangin science-ah Master degree a la a, he university aṭang vek hian doctorate pawh a nei. Nikum pawh khan kawvela hmeichhe thiltithei bera thlan a ni tawh a, nikum vek khan khawvela mihring thiltithei ber thlan chhuahah pangana a ni bawk.

Hmeichhe thiltithei an thlan danah chuan thla 12 chhunga media attention an lak dan hi tehna pakhat a ni. Chanchinbu, TV leh media dangten eng angin nge an ngaihven tihte uluk takin an thlir a, hei bakah an influence leh an inpact te an thlir bawk. Politics, sumdawnna, khawtlang thilte bakah engtiangin nge midangte ṭanpuina kawngah hma an lak tihte hi an ngaih pawimawh zinga mi a ni.

Hilllary Clinton hi engtiklai mai pawh hian hmeichhe thiltithei ber zinga mi a ni deuh reng mai. Tunah pawh hian pahnihnaah a awm mek. Forbes-in kum 2004 aṭanga hmeichhe thiltithei an thlan chhuah ṭan aṭang khan a hming a la lang char char. Tunah hian Democrats lamin US presidential candidate atana an hual pakhat a ni.

Pathumnaah Bill Gates-a nupui, Melinda Gates a awm a, kum 2000-a Bill & Melinda Gates Foundation an din aṭangin khawvel hmun hrang hrangah ṭanpuina a sem chhuak hnem tawh hle. Palina hi Janet Yellen a ni a, United Staes Federal Reserve-a an chairperson ni lai a ni. General Motors-a an CEO, Mary Barra chu pangana a ni. Top 10 hian Michelle Obama chu 10-naah a rawn lang. Top 10 chinho hi a tlangpuiin philanthropist, sumdawng lian leh politician an ni tlangpui.

Entertainment khawvela kan hriatlar, Oprah Winfrey chu 12-naah a lang a, Beyonce chu 21-naah awmin, Angelina Jolie chu 54-na a ni a, Sofia Vergara chu 57-naah a lang pha. Taylor Swift, Shakira leh Ellen DeGeneres te pawh top 100-ah an lang pha a ni.

State Bank of India-a Chair-Managing Director ni lai, Arundhati Bhattacharya chu 30-ah a lang a, nikum khan 36-na a ni. Ani bakah hian ICICI CEO- Managing director Chanda Kochhar chu 35-naah, Biocon Ltd-a an founder Kiran Mazumdar-Shaw chu 85-naah a lang a, HT Media-a an chairperson Shobhana Bhartia chu 93-naah a lang bawk.