Jaui 'Thlasik Daifim' khan a far ve tawh che em?

A 'Hlutna' hla a lar mek laiin a hlutna belhchhah turin nizan hmasa khan Jaui chuan hla thar 'Thlasik Daifim' a tichhuak.

Jaui hian a hla tharah hian a hla danga a thawhpui ṭhin Hope Music bawk a thawhpui leh a, 'Thlasik Daifim' pawh hi Hmachhuana Khiangte (Hope Music) phuah niin Remruata Bilywaif chuan music video hi a siam sak thung a ni.

Thlasik boruak a inher chhuak a, khua a vawt ṭan a, Krismas rim a nam ṭan vel lai takin chumi rem tur tak hla chu Jaui hian a rawn tichhuak a, a hit leh hle ang tih a rinthiam nghal theih. He hlaah hian tunlai van boruak mawi tak leh tlai ni tla tur mawi ṭhinziate a rawn pholang a, ṭhenrualte nena hun hman a chakawmzia te pawh a rawn tarlang bawk.

Hla 'hot' angreng tak ni chung siin a lunglen thlak tel a, hla phuahtuin a phuah thiam piah lamah Jaui hian a sa thiam lehpek bawk a, kumin thlasik chhung na na na chuan mi tam tak playlist a ni leh ngei ang.

Jaui hi Ṭhazual Award sem turah Best Female Artist award la thei mai tur dinhmuna ding a ni a, tunlai lengzem artist zingah chuan ani aia huhang ngah hi an tam lo hle ang. 'Thlasik Daifim' hi a music video pawh hmuh a nuam hle a, Jaui hi a zei ve hrim hrim bawk nen, a fan-te tan chuan music video thar a tichhuak hi a lawmawm hle ngei ang. I lo la ngaithla ve lo a nih chuan Jaui YouTube channel lamah ngaihthlak tur a awm reng tawh e. Spotify leh streaming service dangah pawh a awm leh vat beisei ila kan tisual awm lo e.