WhatsApp-ah voice message ziakin chhiar theih

Instant messaging leh voice-over IP service, WhatsApp chuan feature thar a siam belh zel. Voice message inthawn chu ziaka chhiar theihna tur a siam thar leh a, mahse user zawng zawngin an la hmang thei lo thung.

WhatsApp feature thar hmang hian voice message thui taka inthawn chu ngaihthlak chhuah kher ngai loin, a content chu ziakin a chhiar theih dawn a ni. Voice message transcript tur hian setting aṭangin activate a ngai dawn a, hemi hnu hian voice message an dawn chu hmet vang vangin 'transcibe' tih lo lang chu an hmet ang a, an thu sawi chu a rawn inziak tawh mai dawn a ni. Ṭawng thlan tur bik a awm ang. Ṭawng thlan tur hi English, Portuguese, Spanish leh Russian te a awm dawn a ni. User hian voice message hi ziaka chhiar theiha dah an duh leh duh loh an thlang thei bawk ang.

Voice message thawn, ziaka chhiar theiha siam hi a hmangtu device bikah chauh lang dawn a, WhatsApp ngei pawhin a chhiar leh ngaihhlak sak thei dawn lo a ni. Mahse, WhatsApp chuan a text-a inziak hi a dik famkim lo thei dawn tih sawiin, background noise emaw, ṭawng fiah tawk loah chuan 'transciption unavailable' error a lang dawn niin a sawi lawk. Version ṭhenkhatah enchhin mek niin, khawvel puma WhatsApp user-te hman theih tura chhawp chhuah thuai tum a ni.