Praise on 2024 pakhatna Lalthlanawma

Central KṬP leh Synfo buatsaih, mal zai intihsiakna Praise on 2024 chu zawh fel a ni ta. Lalthlanawma, Ramhlun Branch KṬP chu pakhatna a ni a, lawmman Rs 1,20,000 a dawng.

Pahnihna J. Lalruatsangi, Sihphir Branch chuan Rs 70,000 leh pathumna Samuel Lalmuanchhana, Armed Veng Branch chuan Rs 50,000 an dawng bawk. Top 5-a tling pahnih, P. Vanlalhriatpuia, Chaltlang South Branch leh Maria Lalmuanpuii, Chhiahtlang Bazar Veng Branch chuan Rs 15,000 ve ve an dawng. Top 10-a tling dangte pawhin Rs 10,000 ṭheuh an dawng bawk a ni.

Praise on 2024 intihsiak hi September 3, 2024 khan a hlanna neih a ni a, audition round hi September 6-28 chhungin Aizawl bakah Champhai, Serchhip, Kolasib leh Lunglei-ah neih a ni. First Round hi October 14-16 chhung neih niin, October 24 leh 25-ah Second Round neih a ni leh a, heta ṭang hian top 10 thlan chhuah a ni. Top 10 te hi November 7 leh 8 zanah intihsiakin an zing aṭangin Top 5 thlan chhuah an ni a, Top 5-te hi November 21 zan khan hla pahnih, an hla duhzawng leh judge-ten an thlan chhuah hmangin an intihsiak leh.

November 22, 2024 zanah Dawrpui Kohhran Hall-ah Grand Finale neih a ni a, intihsiak result puangin lawmman semna hun hman nghal a ni. Ramhlun Branch aiawh, Lalthlanawma chu zai thiam berah thlan chhuah a ni ta a ni.

Praise on 2024-ah hina Upa F. Lalthanmawia, Bungkawn; R. Lalrinmawii (Arini(, Leitan leh Michael Lalneihtluanga, Mission Veng te chu judge an ni.