Khiangte Construction Ṭhazual Gospel : A chung berah Seraphic Choir

Khiangte Construction Ṭhazual Gospel chart tharah Gospel group kan neih ṭhat ber zinga mi, zaia rawngbawlna kawnga thawh hlawk tak, Seraphic Choir chuan 'Ka chhanna neihchhun' tih hla hmangin a chung ber an luah.

Seraphic Choir hi Ṭhazual Awards 2024-ah Gospel category-a Best Group dawngtu an ni a, an member-te hi Marilyn Lalnunthari, Tuikual North; Ngursangzuali, Salem Veng; H.C Lalhlimawmi, Venghnuai; TBC Ramthianghlima, Zotlang; Lalngaihzuala Fanai, Khatla South leh Ngurnuntluanga , Kulikawn West te niin, an director hi Lalchhandama, Venghnuai a ni. An zai thiamin an zai nung hle a, zaia sawmtu pawh an ngah ṭhin hle. 'Ka chhana neihchhun' hi PB Lalbiakzuala phuah niin, music hi Allen Home Records siam niin, HC Recording Studio-ah recording hi an ti a, video hi RDS Shots Video Production kut chhuak a ni. September 20, 2024 khan music video hi dah chhuakin, en leh thlir pawh a hlawh hle.

One in Christ chuan Krista hnehna changtute' tih chu pahnihna an rawn lanpui bawk. Tun ṭum chart-ah hian Gospel group lar pahnihte an rawn chungnung a ni. Anni group pahnih hian top 10-a hla dang, 'Aw zan thianghlim' leh 'Ni ropui' an lanpui ve ve bawk. Vesper Vuite 'Ka thlamuanna Krista', Zorinsanga Sailo 'Beiseina' leh R. Lalrinmawii 'Ka tan a tawk' tihte chu Top 5 ah an lang bawk.