Zaninah Arkai den zan: Vanlalruati zan hmang dawn

Zonet Arkaiden zan vawi 6-na chu zanin hian hman a ni leh dawn. Tun ṭum Arkaiden zan hman tur hi Mizo zaithiam lar, Zoawi Lelte tia a hming an lo chawi, Vanlalruati zan atan hman a ni ang.

Zanina hun hman tur hi ṭum danga Arkaiden zan hman ṭhin ang lo deuhin hman a ni dawn a, TNT tana vehbur khawnna hun a ni tel dawn a ni. Hun hmanna tur pawh hi TNT Ground-ah a ni dawn a, zan dar 8 aṭangin ṭan a ni ang. Zonet Zawlbuk, Zonet HD leh Zonet Empai-ahte live-in an pe chhuak dawn bawk.

Vanlalruati hla lo sak tawhte - fakna, lenglawng leh lengzem te chu tunlai zaithiam larten an rawn sa dawn a, Michelle Varte, Zaii Hauchhum, Zoramchhani, Zothana, Duhawma Chhakchhuak, Zorini Khiangte, Cindy Lalthanpuii, Zorinsanga, Ngura bakah Lilac & Jacks band an inlan ang. Host Zonuni Pachuau in a kaihruai leh dawn a ni.

Zaithiamten Vanlalruati hla an rawn sak turte hi - Lalpa chak lo mah ila, Ka perhkhuang zaitin thiam, Hawilo par, Hrai chawi, Zoawi Lelte, Mim ang kan piang hmun ta silo, Tleitiri, Engan ka lo tawn che, Awmkhawhar lenkawl, Lengdang dar ang a chhai an ti che, Khuavel i la chhing ngei ang, Tawnthar D Valmawi, Phuloh lenmawi, Ka chan tawkah ka lungawi lo, Chhingkual lenmawi, Autograph, Hmangaihna vanduai, Tuai duh lawmlai Valte, Pari zun leh Tunge Ruati i ngaihzawng te an ni. TNT Ground-a hun hmanah hian Vanlalruati chanchin tarlanna, video display neih a ni dawn bawk a, a chhungte aiawhin u, Vanhmingliana'n thusawina hun a hmang bawk ang. Zonet director LV Lalthantluanga'n citation hlanna hun a hmang dawn bawk a ni

Vanlalruati puala hun hmanah hian Thutak Nupuitu Team (TNT) pualin vehbur khawn a ni dawn a, Gpay aṭangin ṭanpuina pek theih a ni dawn a, a pek theihna tur hi an rawn tarlang dawn a ni.