Henry Varte Kum 7 hnuah solo video Seoul-ah a kal dawn

Group, duo leh trio-ah te chuan kan hmu fo a, mahse a solo video tak hi a tichhuak khât ta hle. Henry Varte chuan kum sarih hnuah ama solo music video thar ber tur chu a tichhuak dawn ta.

Henry Varte music video thar hi kan hriatlar leh kan sak fo ṭhin, mi tam tak tan chuan a ni ngei ang. Kristian Hla Bua mi, 150-na 'Khawvel hi bo mah se' tih hla kha a ni a, grand piano nen chauha rem a ni a, ngaihthlak a chakawm tawh hle. Blue Waves Recording-a record a ni a, piano hi Lalchhanhima Khiangte-in a play a, Andrew Lalbiaknunga'n video lam a khawih thung. Live veka record a ni.

Henry hian mimala solo video a tihchhuah hnuhnun ber chu kum 2008-a mi, BDA phuah 'Amen' hla a ni a, a chhunzawmna a khât khawp mai. Henry chuan, 'Nia, mimalin ka ti vak lo vang vang a, group khan kan han tiho lawp lawp a, chumi kar lakah chuan Maggie te nen, Debbie te nen khan kan han tiho leh bawk. Mimal tak hian ka kal leh ta lawk lo a ni," a ti.

Parema hla phuah dahkhawmna, 'Ka Rinchhan Lalpa'-ah khan a mimal chuan a nei ngei a, mahse ama hmalakna tak chuan tuna mi hi a solo music video pangana a ni. Group-in pali an siam hman a, trio leh duo pakhat ve ve a nei bawk.

Henry Varte chuan group angin tunah rih chuan an kal lei thei lo tih a sawi a, a chhan ber chu Mizorama an awm kim loh vang a ni. Tunah hian Freddie chu India ram pawnah a awm mek a, hei vang hian group anga hmalak a la buaithlak rih a, Mizorama a rawn haw veleh hmalak ṭan leh tho chu an tum.

Henry hian tunah hian album buaipui a tum rilru mek a, mahse a album kalpui dan tur kimchang erawh chu a la sawi duh lo, danglam deuh tak, music ngainatute tana man hla, zai hrim hrim ngainatute tan pawh ṭha tak siam a tum. "Ruahmanna chu tam tak ka nei tawh a, mahse ka rilruk ang erawh chu ka la sawi chhuak phal rih lo. Nakinah a dawn hnaihah te chuan kan la puang chhuak mah na," a ti.

Music thar a rawn neih chhoh leh mek lai hian Henry Varte hi Seoul kal turin a inbuatsaih mek. South Korea khawpui Seoul-ah July thla hian Global Leadership Training neih a ni dawn a, heta tel tur hian Global Leadership of Institute chuan an rawn sawm a ni. A kal hun tur tak hi a la chiang lo a, visa a buaipui phawt a ngai ang.